Këto pamje të kamerave të sigurisë tregojnë momentin kur rrëzohet helikopteri i pronarit të ndjerë të ekipit Leicester, miliarderit Vichai Srivaddhanaprabha. Helikopteri sapo ishte ngritur nga stadiumi përpara se të përplasej duke vrarë pesë pasagjerët në bord.
Nga aksidenti i rëndë vdiqën miliarderi i njohur, asistenti i tij dhe Nursara Suknamei, një mbretëreshë tajlandeze e bukurisë.
Piloti hero, Eric Swaffer dhe e dashura e tij, Izabela Lechowicz, ndihmëspilote, vdiqën po ashtu, por shpëtuan qindra jetë njerëzish pasi e përplasën helikopterin larg turmës së tifozëve që ndoqën ndeshjen kundër West Ham.
Shkaqet e aksidentit nuk janë përcaktuar akoma, por policia ka mohuar spekulimet se një dron i tyre mund të ketë shkaktuar rrëzimin. Dëshmitarët thonë se kanë parë helikopterin teksa kishte humbur kontrollin dhe rrotullohej në ajër.
Një gazetar tha se kishte dëgjuar fillimisht një zhurmë të fortë, më pas një heshtje të frikshme pasi motori i helikopterit ndaloi në ajër. Ekspertët thonë se do ketë pasur probleme me rotorin e bishtit të helikopterit. Për shkak se rotori ka dalë jashtë funksionit, helikopteri është rrotulluar në mënyrë të çrregullt në ajër.
Kjo njihet në gjuhën e pilotëve edhe si Kurba e Njeriut të Vdekur. Ajo ndodh kur mjeti po fluturon shumë avash dhe shumë ulët për të fiku motorët dhe për të performuar një ulje emergjence. Pilotët janë të trajnuar që të fikin motorin dhe të ndalojnë helikopterin që të mos rrotullohet duke përdorur ajrin nga helikat e rotorit kryesor për të bërë uljen e emergjencës.
Por në rastin kur shpejtësia dhe lartësia janë të ulëta, edhe pilotët më të mirë nuk kanë asgjë çfarë të bëjnë.
