Për kryeministrin e Kosovës Albin Kurti, Ballkani Perëndimor është në rrezik të një konflikti të ri pas situatës së krijuar nga lufta në Ukrainë. Sipas tij, presidenti i Serbisë Aleksandër Vuçiç është “kukull e Kremlinit” që sundon një vend që “imiton Rusinë”.
Në një intervistë për ‘La Repubblica’, Albin Kurti thotë se sheh një përpjekje për të destabilizuar Ballkanin, pasi sipas tij, ndikimi i Putinit është shumë i fortë në disa vende të Ballkanit Perëndimor.
“Bashkimi Sovjetik është transformuar në një oktapod me Federatën Ruse në qendër dhe tentakulat e saj: Donbass, Krimea, Transnistria, Osetia e Jugut… Ish-Jugosllavia është një oktapod me Serbinë në qendër, entiteti serb në Bosnje, një entitet serb subjekt në Mal të Zi që nuk e njeh pavarësinë e këtij vendi si dhe strukturat ilegale në veri të Kosovës”, tha Kurti.
Ai u shpreh i ashpër ndaj qëndrimeve të Serbisë karshi Rusisë, duke thënë “Serbia dëshiron paratë evropiane dhe armët ruse”.
“Dhe gazin rus, të cilin e merr me një çmim të volitshëm, por në fakt shumë të shtrenjtë: të jetë kukulla e Kremlinit. Vitin e kaluar Kosova mori pjesë me 350 ushtarë në stërvitjen më të madhe të NATO-s, ‘Defender Europe 2021’. Serbia në vend të kësaj mori pjesë me Rusinë dhe Bjellorusinë në ’mburojën sllave’”, u shpeh Kurti.
Ai përsëriti se Kosova ka intensifikuar përpjekjet për anëtarësime euro-atlantike dhe se këto procese janë vendimtare për sigurinë e rajonit.
“Këtu janë tre kombe të NATO-s: Shqipëria, Maqedonia e Veriut dhe Mali i Zi. Pastaj është Kosova ime, e cila nuk është në NATO, por e ka NATO-n në vetvete (misioni paqeruajtës i KFOR-it, i cili ishte dhe do të kthehet në udhëheqjen italiane). Ne duhet të marrim një hap i mëtejshëm drejt partneritetit në Programin e Paqes të NATO-s: është vendimtar për sigurinë e rajonit”, u shpreh Kurti.
