Saktësisht, Edi Ramës këto ditë i ka ngelur vetëm policia. Legjitimiteti i shumicës i ka rënë me kohë, qyshse dolën në dritë krimet zgjedhore, ku u kuptua se si ai e mori gjithë timonin për vete në mandatin e dytë.
Lëkurët i kanë rënë njëra pas tjetrës. Me dështimin ekonomik, me dështimin e menaxhimit të pandemisë, me dështimin e rindërtimit, me deshtimin e integrimit, me dështimin e asaj që ishte kali i betejës, reforma në drejtësi. Po bëhen 3 vite që vendi nuk ka Gjykatë Kushtetuese dhe Gjykatë të Lartë.
Të gjitha këto, teksa ka marrë çdo pushtet e çdo zyrë në vend, edhe 60 bashkitë me të famshmet votime të 30 qershorit.
Pati vetëm një moment ku ai mori disa grimca legjitimiteti, kur u ul në tryezë me opozitën dhe firmosi një marrëveshje politike. Po edhe atë e shkeli një muaj më pas.
Prej një jave, të rinjtë e zemëruar i kanë hedhur në tokë çdo shtresë tjetër. Dhe ata kanë marrë një mbështetje të paprecedent në publik.
Tani Edi Ramës i ka mbetur vetëm policia dhe skuadronet e forcës të reparteve speciale.
Bujar Kapexhiu ka guxuar edhe më shumë. Sipas tij, ai nuk ka më as servilët më besnikë, intelektualët e shquar të rilindjes.
Në këtë karikaturë për gazetën Mapo, mjeshtri Kapexhiu thotë se Ramën po e përcjellin edhe ata që e quajnë skenderbe, që e adhurojnë pa kushte. Mesa duket, me gjithë teprimet në idhujtari, ata nuk e kanë humbur aftësinë për të kuptuar kur anija fut ujë.