Nga Red Varaku
Pavarësisht insinuatave të krijuara për shkak të një operacioni të dyshimtë dhe joprofesional të Zërit të Amerikës, operacion që ka nevojë të padiskutueshme për një sqarim shumë shterues nga vetë institucionet Amerikane, në Shqipëri ka dukshëm dy qëndrime politike që ende po i shërbejnë (në mënyrë të vetëdijshme ose jo) agjendës ruse për rajonin.
Qëndrimi i parë është përpjekja për zvarritjen e procesit të integrimit dhe izolimi nga Perëndimi, çka është në fakt krye objektivi i agjendës ruse në lidhje me të ardhmen e shqiptarëve, e cila lidhet në mënyrë të drejtpërdrejtë me përpjekjet për të mbajtur rajonin larg Bashkimit Europian.
Kjo nëpërmjet akteve të mirëfillta politike siç janë asgjësimi i demokracisë përmes masakrës zgjedhore, pengimi i drejtësisë nëpërmjet kapjes politike të SPAK , bllokimi i reformave dhe zvarritja e proceseve politike që përmbushin kushtet për integrim me qëllim instalimin e një regjimi të ngjashëm me regjimin putinist.
Ndërsa, qëndrimi i dytë është kundërvënia ndaj planit Amerikan për zhvillimin e rajonit dhe përpjekja për të futur shqiptarët në konflikt me SHBA-të.
Nuk ka nevojë të argumentojmë se të gjitha përpjekjet për të bllokuar këtë plan, kryeobjektivi i të cilit prej 1990 mbetet integrimi i të gjithë Ballkanit Perëndimor në Bashkimin Europian i shërbejnë padyshim misionit kryesor strategjik të Rusisë.
Kjo sepse futja e shqiptarëve në konflikt me SHBA-të, partnerin e tyre strategjik më të rëndësishëm, të cilit i detyrohen vetë egzistencën e tyre si komb dhe pavarësimin e Kosovës, prodhon menjëherë defaktorizim të rolit të shqiptarëve dhe fuqizim të faktorit sllavo-rus.
Gjithashtu, nxitja e konflikteve etnike që janë produkt i shpërbërjes së ish-Jugosllavisë, përpjekja për të bllokuar arritjen e një marrëveshjeje përfundimtare për konfliktin Kosovë-Serbi dhe vazhdimin e agonisë së Bosnjë-Hercegovinës përmes bllokimit të procesit të integrimit, janë padiskutim materializim i drejtpërdrejtë i strategjisë ruse.
Në këtë kuptim mbajtja e rajonit të izoluar nga sfera perëndimore dhe mbajtja e tij si një vatër autokratësh me “kukulla” pro ruse që prodhojnë konflikte për llogari të Rusisë me qëllim destabilizimin apo shantazhimin e Perëndimit janë skenarë politikë me regjisorë shumë të qartë për cilindo që ka një formim elementar në politikë.
Kështu pavarësisht operacioneve të paguara dhe të dyshimta të piarit që tentojnë të ambalazhojnë dhe të shesin “agjentë” rusë, duke ricikluar akuza qesharake dhe pa asnjë provë me qëllim ngritjen e një tymnaje për zhvendosjen e vëmendjes së opinionit publik, çdokush e ka të qartë se kush po i shërben sot në të vërtetë, jo me fjalë por me akte politike, armikut të tyre më të madh historik.
