Ngërçin e krijuar për zgjedhjen e anëtarëve të Gjykatës Kushtetuese, mazhoranca prentendon se do ta zgjidhë duke e çuar në Komisionin e Venecias. Kreu i grupit parlamentar socialist Taulant Balla, akuzoi Presidentin Meta si kundërshtar të reformës në drejtësi.
“Për sa kohë kundërshtarët e Reformës në Drejtësi vijojnë tentativat për bllokimin e saj, Kuvendi duhet të rishikojë legjislacionin për të shmangur krijimin e situatave që pengojnë në mënyrë abuzive funksionimin e organeve kushtetuese të vendit. Opinioni i Komisionit të Venecias gjithmonë është i domosdoshëm dhe i mirëpritur”, u shpreh ai.
“Sikurse është vepruar nga ana e Komisionit Hetimor Parlamentar në rastin e aktit antikushtetues të Presidentit për ç’dekretimin e datës së zgjedhjeve të 30 Qershorit, që Kryetari i Kuvendit në emër të Kuvendit të Shqipërisë t’i drejtohet Komisionit të Venecias. Një institucion i gjithëpranuar, jo vetëm në Shqipëri, por kudo në Europë e më gjerë, për cilësinë e opinioneve të veta. Kujtojmë këtu që opinioni i Komisionit të Venecias për çështjen e ç’dekretimit të zgjedhjeve ka qenë i plotë, ka qenë i qartë dhe në këtë këndvështrim, është e domosdoshme që edhe në këtë rast Komisioni Hetimor t’i drejtohet kryetarit të Kuvendit, që sapo të jetë miratuar nga Kuvendi zgjerimi i objektit të hetimit dhe të marrë kohën e nevojshme komisioni, duke zgjatur edhe afatin e punës së Komisionit, t’i drejtohemi menjëherë Komisionit të Venecias me qëllim që ky institucion i gjithëpranuar për opinionet objektive, të japë vlerësimin e vet”, tha më tej Taulant Balla.
Sipas tij mazhoranca është në një gjatësi vale me partnerët ndërkombëtarë.
“I bashkohem vlerësimit të partnerëve tanë strategjikë Shteteve të Bashkuara të Amerikës, por edhe Bashkimit Europian, sepse edhe zëdhënësja e Komisionerit për Politikën e Jashtme, Maja Koçijançiç ka qenë në të njëjtën gjatësi vale”, theksoi ai.
Lexo edhe:
“Për Ramën e disa palaço ndërkombëtarë, zgjidhja është referendumi”
