Tre anëtaret e reja të Gjykatës Kushtetuese, dy të zgjedhura nga Parlamenti dhe një nga Presidenti do të betohen sot.
Në një njoftim për mediat thuhet se Meta ka thirrur për tu betuar, Fiona Papajorgjin, Elsa Toskën dhe Marsida Xhaferllarin.
Kësisoj thellohet konflikti mes institucioneve, pasi pas betimit, znj. Marsida Xhaferllari duhet të shkojë në gjykatë, ku për të njëjtin vend është betuar para noteres, edhe Arta Vorpsi.
NJOFTIMI I PRESIDENCES
14 Nëntor 2019 Njoftim mbi organizimin e ceremonisë së betimit të gjyqtarëve të rinj të Gjykatës Kushtetuese
REPUBLIKA E SHQIPËRISË
INSTITUCIONI I PRESIDENTIT TË REPUBLIKËS
Nr. 4312/1 Prot. Tiranë, më 14.11.2019
NJOFTIM
MBI ORGANIZIMIN E CEREMONISË SË BETIMIT TË GJYQTARËVE TË RINJ TË GJYKATËS KUSHTETUESE.
Presidenti i Republikës, Sh.T.Z. Ilir Meta, në mbështetje të nenit 129 të Kushtetutës dhe nenit 8 të ligjit nr. 8577/2000 “Për organizimin dhe funksionimin e Gjykatës Kushtetuese”, të ndryshuar, ka vendosur të thërrasë sot për betim, përpara Presidentit të Republikës, anëtarët e rinj të zgjedhur të Gjykatës Kushtetuese.
Zonja Elsa Toska e zgjedhur anëtare e Gjykatës Kushtetuese me Vendimin nr. 133/2019 datë 11.11.2019 të Kuvendit të Shqipërisë, thirret për betim përpara Presidentit të Republikës, sot në datë 14.11.2019, ora 19:00.
Zonja Marsida Xhaferllari, e emëruar anëtare e Gjykatës Kushtetuese nga Presidenti i Republikës me Dekretin nr. 11350, datë 13.11.2019, thirret për betim përpara Presidentit të Republikës, sot në datë 14.11.2019, ora 19:30.
Zonja Fiona Papajorgji e zgjedhur anëtare e Gjykatës Kushtetuese me Vendimin nr. 134/2019, datë 11.11.2019 të Kuvendit të Shqipërisë, thirret për betim përpara Presidentit të Republikës, sot më datë 14.11.2019, ora 20:00.
Ceremonia e betimit zhvillohet në Institucionin e Presidentit të Republikës dhe për këtë ftohen të jenë të pranishëm dhe anëtarët e Gjykatës Kushtetuese dhe Sekretari i Përgjithshëm i Gjykatës Kushtetuese.
Lexo edhe:
Zëri i Amerikës: Thellohet kaosi me emërimet në Gjykatën Kushtetuese
