Dhoma e Ulët e Parlamentit të Gjermanisë miratoi rritjen e pagës minimale në 12 euro (12,89 dollarë), duke filluar nga 1 tetori. Ministri i Punës, Hubertus Heil tha se do të përfitojnë më shumë se gjashtë milionë njerëz që punojnë në ekonominë më të madhe të Evropës.
“Prej legjislacionit, i cili do të marrë miratimin përfundimtar nga Dhoma e Lartë e Parlamentit të premten e ardhshme, do të përfitojnë kryesisht gratë dhe njerëzit në ish-shtetet lindore komuniste”, tha Heil në një postim në Twitter.
Ai gjithashtu u shpreh, se do të ndihmojë punëtorët me të ardhura të ulëta të përballen me kostot në rritje për ushqim dhe ngrohje, të cilat kanë ndihmuar në rritjen e normës së inflacionit të Gjermanisë.
Gjermania ka një pagë bazë për orë që nga viti 2015, pasi më parë ka qenë një nga vendet e pakta evropiane që nuk e kishte futur një të tillë. Paga minimale aktualisht është 9.82 euro në orë dhe do të rritet në 10.45 euro nga 1 korriku.
Martin Rosemann, një zëdhënës për politikën e punës për SPD-në e kancelarit Olaf Scholz, tha se paga minimale do të ndihmojë në mbylljen e hendekut gjinor të pagave dhe “të mbrojë njerëzit me të ardhura të ulëta nga varfëria në pleqëri”.
“Veçanërisht për shumë punonjës në sektorë me pak mbulim të marrëveshjeve kolektive, si gastronomia, pastrimi dhe shitja me pakicë, rritja e pagës minimale është gjithashtu një shenjë e respektit që shoqëria ka për këto profesione të rëndësishme,” tha Rosemann në një deklaratë të dërguar me email./Liberale.al
