Arrestohet 34-vjeçari Erion Alibej, që organizoi dhe porositi vrasjet e Emiljano Ramazanit dhe Regis Runajt në Elbasan.
Erion Alibej është vëllai i Endrit Alibej, të ekzekutuar dy vite më parë në Elbasan. Erion Alibej së bashku me vëllain e tij drejtonin një grup të trafikut të drogës në Holandë e Itali. Ende nuk dihet se Erion Alibej kërkoi vrasjen e Emiljano Ramzanit dhe Regis Runajt. 34-vjeçari njihej edhe me emrin Erion Dylgjeri.
Hetimet janë zhvilluar nga Prokuroria e Elbasanit. Dyshohet se këto vrasje janë kryer për hakmarrje.
“Nga hetimet e kryera rezultoi se ky shtetas është organizatori dhe porositësi i dy vrasjeve të ndodhura më datë 20 korrik në qytetin e Elbasanit, në lagjen “28 Nëntori”, ku u vra me armë zjarri shtetasi Emiljano Ramazani dhe i vrasjes së ndodhur më datë 29.07.2020, në afërsi të varrezave të qytetit, ku mbeti i vrarë me armë të ftohtë shtetasi Regis Runaj“, – thotë policia.
Emiljano Ramzani u ekzekutua më 20 korrik, ndërsa 9 ditë më vonë u vra Regis Runaj. Ngjarjet tronditën Elbasanin por duket se janë zbardhur, pasi në pranga janë edhe autorët e dyshuar që kryen vrasjet.
Grupi “Alibej” të zbuluar në Itali dhe që merrej me trafik droge. Pikërisht prishja e pazareve të drogës dyshohet se solli edhe Masakrën e Elbasanit në dhjetor të 2018-së, ku mbetën të vrarë 3 persona, mes tyre edhe Indrit Alibej.
Erion Alibej është vëllai i Indrit Alibejt (që njihej me nofkat “Tino” dhe “Tarzan”) që ishte shënjestra së bashku me xhaxhanë e tij, Arben Dylgjeri dhe turkun Erdal Durunay që u ekzekutuan në 29 dhjetor të 2018 në Elbasan.
Erion Alibej ka qenë i dënuar në Itali me 4.5 vite burg për trafik kokaine. Ai u arrestua në Torino në 2012 së bashku me disa anëtarë të tjerë të bandës, ndërkohë që pasi shleu dënimin u rikthye në vend.
Në Shqipëri telashet nuk kishin të mbaruar, pasi rreth 2 vite e gjysmë më parë u arrestua për një plagosje dhe tani ndodhej në arrest shtëpie. Ai akuzohet se plagosi Xhon Rustën. Por fakti se ishte nën akuzë dhe në arrest shtëpie nuk e pengoi që të porosiste tre vrasje. Erion Alibej është në skedat e policisë si person me rrezikshmëri, por nuk arritën që të parandalonin krimet.
Grupi i kokainës:
Sipas policisë italiane të dy vëllezërit drejtonin një grup te trafikut të drogës nga Holanda drejt veriut të Italisë. Sipas dosjes italiane dy vëllezërit të konsideruar si koka e grupit u vendosën në përgjim në gusht të vitit 2011 pasi dyshoheshin për trafikim dhe shpërndarje droge në veri dhe në qendër të Italisë. Po sipas dosjes hetimore dy vëllezërit kishin kontakte të shumta si me furnizuesit e lëndës narkotike ashtu edhe me blerësit.
Përgjimet shkuan deri në Amsterdam ku Endrit Alibej shfaqej duke bërë pazare droge me një bashkatdhetarin shqiptar te identifikuar nga policia italiane me emrin Astrit. Në grupin që u godit në Itali në 2012 ka pasur shqiptarë, afrikanë dhe italianë, kokaina trafikohej nga Holanda në Itali.
Njoftimi I Policisë:
Vijon operacioni policor i koduar “Shkumbini”, i zhvilluar nga Drejtoria Vendore e Policisë Elbasan, nën drejtimin e Prokurorisë së Rrethit Gjyqësor Elbasan.
Zbardhet dhe dokumentohet me prova ligjore veprimtaria kriminale në fushën e krimeve ndaj personit, e 34-vjeçarit që është organizatori dhe porositësi i dy vrasjeve të ndodhura gjatë muajit korrik 2020, në qytetin e Elbasanit.
Ekzekutohet masa e sigurisë “Arrest në burg”, për 34-vjeçarin, për veprën penale “Vrasja me paramendin” kryer në bashkëpunim.
Në vijim të punës të bërë nga strukturat hetimore të Drejtorisë Vendore të Policisë Elbasan, nën drejtimin e Prokurorisë së Rrethit Gjyqësor Elbasan, për dokumentimin e plotë të dy vrasjeve të ndodhura gjatë muajit korrik në Elbasan, pasi një pune hetimore dymujore u bë e mundur zbardhja e plotë e këtyre ngjarjeve.
Në këtë kuadër, paraditen e sotme, nga strukturat e DVP Elbasan, nën drejtimin e Prokurorisë së Rrethit Gjyqësor Elbasan, në vijim të operacionit policor të koduar “Shkumbini”, u bë ekzekutimi i masës së sigurisë “Arrest në burg”, lëshuar nga Gjykata e Rrethit Gjyqësor Elbasan, bazuar në provat e grumbulluara gjatë hetimit nga strukturat hetimore, për shtetasin E. A., 34 vjeç, banues në Elbasan, për veprën penale “Vrasja me paramendim” kryer në bashkëpunim.
Nga hetimet e kryera rezultoi se ky shtetas është organizatori dhe porositësi i dy vrasjeve të ndodhura më datë 20 korrik në qytetin e Elbasanit, në lagjen “28 Nëntori”, ku u vra me armë zjarri shtetasi Emiljano Ramazani dhe i vrasjes së ndodhur më datë 29.07.2020, në afërsi të varrezave të qytetit, ku mbeti i vrarë me armë të ftohtë shtetasi Regis Runaj.
Nga Sektori për Hetimin e Krimeve të Rënda në Drejtorinë Vendore të Policisë Elbasan, nën drejtimin e Prokurorisë pranë Gjykatës së Shkallës së Parë Elbasan, po hetohet për përfshirjen e këtij shtetasi në ngjarje të tjera të rënda kriminale të ndodhura kohët e fundit në Elbasan.
