Tjetër ngjarje tragjike te spitalet COVID në vend.
Një pacient me koronavirus është hedhur nga ballkoni i spitalit Infektiv, ku po trajtohej prej disa ditësh, pasi simptomat e sëmundjes kishin agravuar. Ngjarja ka ndodhur rreth orës 12:30 të mesditës së sotme.
Policia raporton se pacienti që është hedhur nga Infektivi është R.B, 69 vjeç. Ai ka mundur të shpëtojë dhe ndodhet nën kujdesin e mjekëve. Kanë qenë kushtet e rënduara psikologjike që kanë shtyrë të moshuarin të tentojë t’i japë fund jetës.
Ky është rasti i katërt tragjik në spitalet COVID të Tiranës dhe i pari që ndodh te spitali Infektiv. Tre rastet e mëparshme janë regjistruar te spitali COVID2 “Shefqet Ndroqi”, ku kanë ndërruar jetë tragjikisht të tre pacientët.
I fundit vetëm një javë më parë ku 52-vjeçari Preng Gjonaj u hodh nga dritarja e katit të katërt të spitalit duke ndërruar jetë në vend.
Përpara tij kanë ndodhur edhe dy ngjarje të tjera tragjike te i njëjti spital. Me 2 shtator në mbrëmje Hasan Mira nga Fullqeti i Klosit, 65 vjeç u vetëhodh nga spitali duke gjetur vdekjen.Pacienti ishte në gjendje të rëndë por jo i intubuar.
Ndërkohë me 13 gusht, Xhino Koça, 29 vjeç, në gjendje të rënduar psikologjike u hodh gjithashtu nga ky spital dhe fatkeqësisht ndërroi jetë.
29-vjeçari kishte rreth një vit me probleme të shëndetit mendor. Në celularin e tij u gjet një SMS që u kishte dërguar familjarëve ku u thoshte se kishte vendosur t’i jepte fund jetës pasi kishte bërë gjëra përtej limiteve të tij. Në fund të SMS thuhej: “Takohemi në botën tjetër”!
Ekspertët bëjnë të ditur se rritja e rasteve të tentativave për vetëvrasje te spitalet COVID vjen si rrjedhojë e problemeve të natyrës psikologjike që shkakton koronavirusi te të infektuarit dhe pacientët që trajtohen në kushte spitalore.
Ndërsa një tjetër shkak sipas mjekëve, janë haluçinacionet që Covid-19 shkakton te pacientët për shkak të nivelit të ulet të oksigjenit në tru, çka mund t’i shtyjë në akte vetëvrasjeje.
LEXO EDHE:
Pacienti u hodh nga Infektivi, Policia: Ka shpëtuar, ndodhet nën kujdesin e mjekëve
Pamjet e para te Infektivi, pasi 69-vjeçari me koronavirus u hodh nga spitali (FOTO)
