Tronditet sërish Tirana. Një vrasje me armë zjarri ka ndodhur në zonën e Astirit, rreth orës 20:45 minuta. Policia bën të ditur se viktimë e kësaj ngjarje ka mbetur V.T, 28 vjeç, i cili është qëlluar për vdekje pranë ambienteve të një lokali.
Mësohet se i riu është thirrur jashtë lokalit nga një person tjetër dhe më pas është qëlluar me një plumb i cili ka rezultuar fatal. Uniformat blu kanë ngritur pika kontrolli si dhe vijojnë hetimet për zbardhjen e rrethanave të kësaj ngjarje.
Njoftimi i policisë
Rreth orës 20.45, në Astir, në një rrugicë, në afërsi të një lokali, në rrethana ende të paqarta është plagosur me armë zjarri shtetasi V.T, rreth 28 vjeç, i cili më pas ka gjetur vdekjen.
Menjëherë në vendngjarje kanë shkuar shërbimet e Policisë, të cilat kanë bërë rrethimin e zonës në një perimetër të gjerë.
Janë ngritur pika kontrolli në të gjitha akset rrugore si dhe vijon puna nga grupi hetimor për sqarimin e rrethanave të ngjarjes, grumbullimin dhe fiksimin e çdo prove që do çojë në zbardhjen e ngjarjes, identifikimin dhe arrestimin e autorëve.