Pavarësisht zhvlerësimit të euros gjatë muajve të fundit fundit, në ekonominë shqiptare po dominon përdorimi i monedhës europiane.
Shumë qytetarë dhe biznese marrin kredi në monedhën europiane, ashtu sikundër kanë edhe depozitat. Po ashtu, më shumë se gjysma e borxhit publik në 6 muaj e parë të këtij viti është në euro.
Shumica e pagesave në vlerë të madhe, vitet e fundit në Shqipëri po bëhen në euro, dhe për këtë dëshmia më e pastër është tregu imobiliar, ku si qiratë ashtu edhe blerjet paguhen në monedhën evropiane.
E njëjta gjë po ndodh edhe me kreditë e marra nga qytetarë e bizneset, apo me depozitat e qytetarëce. Në një raport të fundit të Bankës së Shqipërisë, në kuadër të procesit të de-euroizimit (procesi për uljen e përdorimit masive të valutës në Shqipëri), thuhet se pozitat e euros në tregun shqiptar janë rritur përkundrejt lekut. Sipas raportit kreditë në valutë në fund të muajit qershor ishin sa 51.2% e totalit të kredive, ose 1.4% më shumë se një vit më parë. Nga këto 34.3% e kredive janë të pambrojtura nga luhatjet e kursit të këmbimit, që do të thotë se nuk është parashikuar në kontratë luhatja e mundshme, ku të dyja palët kanë marrë përsipër riskun.
E njëjta situatë është edhe për depozitat. Në fund të gjashtëmujorit depozitat në valutë arritën në 53.2% të totalit të depozitave të klientëve, duke u rritur me 2.3% në raport me një vit më parë, dhe pjesa më e madhe ishin në euro.
Nga ana tjetër përkundrejt planit të de-euroizimit të miratuar nga Banka e Shqipërisë në vitin 2018, pjesa më e madhe e borxhit publik është në valutë, me 51.3% të totalit të borxhit publik, ku 70% të vlerës së borxhit është në euro.
Ky fenomen po kontribuon në drejtim të kundërt me masat e deeuroizimit, thuhet në raportin e Bankës së Shqipërisë.
