Kryetari demokrat, Lulzim Basha doli në një konferencë për shtyp të mërkurën, për të komentuar raportin e fundit të FMN për situatën ekonomike në vend.
Megjithatë interesi më i madh ishte për ta pyetur për një letër të ministrit të Brendshëm, Fatmir Xhafaj, që kërkon nga organi i akuzës të marrë në pyetje Bashën dhe ish-kryeministrin Sali Berisha si persona që kanë dijeni për drogën në Maminas.
Basha tha se kjo është një letër e dënueshme.
“Kjo letër është akt i dënueshëm i Fatmir Xhafajt, është vendosja dhe de juro e prokurorisë në urdhrat e qeverisë. Informacioni më i sigurtë që mund të japë unë për të gjetur rrugët e kokainës në Shqipëri ësdhtë që prokuroria mjafton të gjurmojë Olsi Ramën dhe Agron Xhafën”, tha Basha.
Ministri i Brendshëm, Fatmir Xhafaj i kërkoi drejtuesit të Prokurorisë së Krimeve të Rënda Besim Hajdarmataj, të thërrasë kryetarin e Partisë Demokratike Lulzim Basha dhe deputetin Sali Berisha, si persona që kanë dijeni lidhur me poseduesit e ngarkesës prej 613 kg kokainë në Durrës.
Përmes një letre, ministri thotë se 2 deputetët duhen thirrur pasi kanë bërë deklarata publike se kanë dijeni se kush e zhvillon trafikun e drogës në vend dhe veçanërisht për faktet që kanë të bëjnë me poseduesit dhe përfituesit e sasisë prej 613 kg kokainë.