Komisioni i Ligjeve i drejtuar nga socialisti Ulsi Manja rrëzoi sot dekretin e Metës për kthimin e Kodit Penal. Kujtojmë se Meta i ktheu parlamentit për shqyrtim ndryshimet në Kodin Penal, por Ligjet vendosën sot të mos i marrin në konsideratë problematikat e percjella nga Presidenti.
E pranishme në Komision, ministrja Etilda Gjonaj tha se “ky projektligj ka një rëndësi të veçantë. Ashpërsimi i veprës penale nuk është e vetmja rrugë, por nga nevoja e mbrojtjes së të drejtave të qytetarëve, u sollën këto ndryshime”, tha ajo. Pas diskutimeve të shumta, Komisioni rrëzoi dekretin e Metës. Në harkun kohor të tri ditëve socialistët i rrëzuan 7 dekrete Presidentit të Republikës.
