Lirohen të gjitha pengjet në sinagogën e Teksasit, sulmuesi i vdekur
Gjatë orëve të natës, ekipet speciale të FBI-së hynë brenda një sinagoge në Teksas dhe liruan pengjet, ndërsa sulmuesi i armatosur u njoftua se ka vdekur. Ndër katër pengjet kishte qenë edhe rabini i kongregacionit Beth Izrael.
Me anë të një deklarate, Presidenti Joe Biden shprehu mirënjohjen për forcat e rendit dhe mbështetjen për komunitetin hebre. Ai shtoi se Shtetet e Bashkuara dënojnë anti-semitizmin dhe ekstremizmin. Sulmuesi kishte hyrë në sinagogë gjatë shërbesës së të shtunës dhe filloi një konflikt me policinë që zgjati mbi 10 orë.
Një ekip i FBI-së për shpëtimin e pengjeve hyri në sinagogën në Colleyville, Teksas, gjatë natës për të liruar tre personat e mbetur peng. Mbi 10 orë më herët, një person i armatosur kishte ndërprerë shërbimin fetar dhe kishte filluar një konflikt me policinë.
“Në sinagogë ishte duke u bërë shërbimi fetar dhe po transmetohej drejtpërdrejt në Facebook, kur filluam të marrim informacion se një person i armatosur kishte hyrë në sinagogë dhe kishte marrë pengje”, tha Michael Miller, shef i policisë në Colleyville.
Të gjithë pengjet u liruan të shtunën mbrëma, ndërsa personi i armatosur kishte vdekur.
“Katër pengjet që u liruan nuk kanë nevojë për ndihmë urgjente mjekësore dhe do të ribashkohen me familjet. Ai nuk kishte lënduar asnjërin prej tyre”, tha Matthew Desarno, drejtues i FBI-së në Dallas.
Sulmuesi i armatosur fillimisht kishte marrë peng katër persona, përfshirë rabinin e Kongregacionit Beth Israel, thanë zyrtarët. Një nga pengjet u lirua i padëmtuar gjashtë orë më vonë.
Autoritetet po punojnë për të identifikuar një motiv të saktë të sulmit.
Pengmarrësi u dëgjua duke kërkuar lirimin e Aafia Siddiquit, neuroshkencëtarja pakistaneze e dyshuar për lidhje me al-Kaedën, thanë zyrtarët. Gjatë komunikimit me negociatorët sulmuesi pati kërkuar edhe të fliste me të.
Gazetarët vendas thanë se dëgjuan shpërthime dhe ndoshta të shtëna pak përpara se guvernatori i Teksasit Greg Abbott të njoftonte se kriza kishte përfunduar.
Departamenti i Policisë së qytetit Colleyville tha se fillimisht reagoi me ekipet e ndërhyrjes së shpejtë duke filluar nga ora 10:41 e mëngjesit gjatë shërbimit të Shabbatit, që po transmetohej në internet. /REUTERS & AP
