Këshilli Politik është mbledhur sërish sot ku prej më shumë se dy orësh palët politike kanë diskututar për hapjen e listave në zgjedhjet e ardhshme parlamentare.
Para nisjes së takimit opozita e bashkuar ka marrë vendimin që të mbështesë hapjen e listave 100%, por të mos preken koalicionet dhe formula e shpërndarjes së mandateve.
Mësohet se në mbledhjen e Këshillit Politik, mazhoranca nuk ka mbështetur nismën për hapjen e 100% të listave. Përfaqësuesi i PS në Këshillin Politik, Damian Gjiknuri është shprehur se PD dhe LSI duhet të gjejnë 28 deputetë që ta propozojnë në Kuvend si nismë ligjore.
Pas përfundimit të mbledhjes së Këshillit Politik, përfaqsuesja e Opozitës Parlamentare Rudina Hajdari ka deklaruar se tashmë të tre palët politike duan lista të hapura dhe ky është një fakt tepër pozitiv, rezultatet e së cilës do të shihen në vijim.
Ndërsa përfaqësuesi i mazhorancës, Damian Gjiknuri theksoi se nuk janë gjetur modele të vendeve të tjera për propozimet e Partisë Demokratike dhe sipas tij është i vështirë implementimi në Kodin Zgjedhor.
Sipas tij, hapja e listave është proces i vështirë dhe 6 ditë nuk mjaftojnë për të kryer të gjithë procedurat për hapjen e tyre. Kjo do kërkojë kohë përtej 30 korrikut, kur do të miratohen në Kuvend ndryshimet kushtetuese.
Pas përfundimit të mbledhjes së Këshillit Politik pas 2 orësh, Oerd Bylybashi dhe Petrit Vasili u shprehën se nëse listat duhet të hapen, hapja duhet të jetë 100% por koalicionet dhe shpërndarja e mandateve nuk duhet të ndryshojnë.
“Opozita e bashkuar bëri prezent në Këshillin Politik qëndrimin e saj të qartë. Nëse do shkohet drejt hapjes së listave ato duhen hapur 100 % me kushtin që formula e koalicioneve dhe formula e ndarjeve të mandateve të mos ndryshojë.
Është fare e qartë për shqiptarët se Edi Rama hapjen e listave e ka alibi. Është një farsë dhe një justifikim për Edi Ramën në funksion të qëllimit për të ndryshuar rregullat e garës.
Përfaqësuesi i mazhorancës refuzoi gjithë kohës propozimin tonë edhe pse ne i dhamë modelet e vendeve të tjera siç janë Belgjika, Danimarka, Italia, Letonia të cilat e kanë përdorur prej 17 vjetësh. E gjithë kjo përpjekje është për të vrarë mundësinë e partive politike për të garuar në liri të plotë.
Ne presim nga mazhoranca të reflektojë, kjo është një çështje e Këshillit Politik, dhe si e tillë duhet diskutuar në Këshillin politik. Çdo lloj përpjekje e mazhorancës është e kotë në sytë e shqiptarëve”, tha Bylykbashi.
LEXO EDHE:
‘Ka sfida të mëdha’/ Gjiknuri: Ndryshimet Kushtetuese mundësojnë hapjen e listave 100 %
