Analisti Fatos Lubonja, i ftuar në rubrikën “Opinion” në “News 24”, duke folur për mbledhjen e përbashkët të qeverisë së Shqipërisë dhe Kosovës, deklaroi se ngjan se kjo mbledhje transferon përgjegjësitë, duke mos u marrë me probleme reale të shqiptarëve.
Lubonja theksoi se alarmi i vërtetë për Shqipërinë është braktisja e vendit.
“Takimi i sotëm mes qeverisë së Shqipërisë dhe Kosovës ishte një farsë. U fol shumë për një alarm të madh që nxorën dy qeveritë, se shqiptarët në Preshevë dhe në Mal të Zi po vuajnë keq e po bënin fond të përbashkët për Preshevën. Kësaj i thonë transfertë, të transferosh alarmin.
Kjo sepse alarmi që kemi ne, që e tha edhe presidenti sot, është ikja e shqiptarëve nga Shqipëria. Në Shqipëri ikin shumë më shumë se në vendet e rajonit. Është alarmi i pasigurisë dhe i pashpresës që janë krijuar për shqiptarët. Kanë kohë që mblidhen duke thënë kuq e zi e jemi bashkë etj. Bëjnë mbledhje të mëdha me fjalë boshe, e ndërsa vendi është në mjerim”, tha Lubonja.
Më tej, Lubonja vlerësoi se Shqipëria për fat të keq nuk prodhon produkte që të jenë të vlefshme, por ka ndërtuar një ekonomi kriminale.
“Shqipëria prodhon më shumë kanabis e drogë dhe kulla që bëhen me paratë e shitjes së lëndëve narkotike. Mbledhja e qeverisë është edhe për të mbështetur njëri-tjetrin dhe ndajnë edhe përgjegjësitë ndoshta.
Akoma Shqipëria e Kosova ‘vazhdojnë të mbyten’ me mallra serbë. Filozofia e Albin Kurtit ka qenë dhe mbetet kundër qeverisjes së keqe në Shqipëri e Kosovë. Kurse, Rama ka dashur përherë të shajë kundërshtarët, denigron kundërshtarët”, deklaroi Lubonja.
Etiketa: Fatos Lubonja, mbledhje e përbashkët, mbledhje qeverie, Shqiperi-Kosove
