Luiza Gega ka rrëmbyer medalje ari në Lojërat Mesdhetare që po zhvillohen në Algjeri.
Në Lojërat Mesdhetare “Oran 2022”, atletja jonë fitoi garën 3000 metra me pengesa, duke shkëlqyer në pistë, teksa dominon në çdo metër të garës.
Askush nuk iu afrua dot atletes tonë, ashtu siç ishin parashikimet.
Gega e ndali kronometrin në 9.14.29, një kohë e jashtëzakonshme, sepse brenda pak ditësh thyen sërish rekordin kombëtar 9:15.48, që u vendos nga vetë Luiza më 6 qershor në Holandë.
Atletja jonë fiksoi edhe kohën më të mirë në Lojërat Mesdhetare, që mbahej nga vetë ajo me 9.27.73 si dhe konfirmoi medaljen e artë që fitoi katër vite më parë në Tarragona.
Me arin e Luiza Gegës, tani Shqipëria ka dy medalje të arta dhe një bronzi.
Atletja shqiptare mban rekord kombëtar në vrapimet 800, 1500 dhe 3000 metra.
Shqipëria përfaqësohet në disa disiplina, në Lojërat Mesdhetare që po zhvillohen këto ditë, në Algjeri.
