Luljeta Bozo, inxhinierja dhe deputetja më e vjetër në moshë që do të hapë seancën e parë plenare në Kuvendin e Shqipërisë, thotë se ish-kryeministrin Sali Berisha nuk mund ta pengojë askush të futet në Parlament.
Një një intervistë për Euronews Albania, Bozo është shprehur se Berishën e ka votuar populli.
“SHBA që kanë marrë atë vendim kanë pasur arsye shumë të forta, nuk e diskutoj fare, aq më tepër për një person që ka drejtuar për aq vite. Nëse hyn apo jo në parlament kjo varet nga dëshira e personit vet. Atë e ka votuar populli, ndaj nuk ka asnjë që ta pengojë të hyjë në parlament”, ka thënë ajo.
Kujtojmë se, në 19 maj 2021, ish-kryeministri Sali Berisha dhe familja e tij e ngushtë u shpallën persona “non grata” nga Shtete e Bashkuara të Amerikës.
Njoftimi u bë nga Sekretari i Shtetit Antony Blinken dhe nga Departamenti Amerikan i Shtetit.
“Veprat e korrupsionit të ish-Presidentit të Shqipërisë, Sali Berisha, minojnë demokracinë në Shqipëri. Unë e shpall publikisht Sali Berishën dhe anëtarët e familjes së tij si të papërshtatshëm për të hyrjë në Shtetet e Bashkuara të Amerikës. Ne vazhdojmë të jemi kundër korrupsionit së bashku me partnerët tanë në Shqipëri”, shkroi Blinken ditën e vendimit.
