Maqedonia e Veriut ka dëbuar sot gjashtë diplomatë rusë, të cilët janë shpallur persona të padëshiruar.
“Në bazë të informacioneve të marra nga organet kompetente, këta persona kryenin aktivitete që janë në kundërshtim me Konventën e Vjenës për Marrëdhënie Diplomatike dhe në pesë ditët e ardhshme do të duhet të largohen nga territori i Republikës së Maqedonisë së Veriut”, thuhet në komunikatën e Ministrisë së Jashtme të Maqedonisë së Veriut (MPJ).
Vendimi i është komunikuar ambasadorit rus, Sergei Baznikin.
Ky është dëbimi i dytë i diplomatëve rusë në më pak se një muaj. Pesë diplomatë rusë u dëbuan më 28 mars, pasi edhe ata kishin vepruar në kundërshtim me Konventën e Vjenës për Marrëdhënie Diplomatike.
Edhe vitin e kaluar, Maqedonia e Veriut shpalli si të padëshiruar dy diplomatë rusë, njëri në muajin maj dhe tjetri në gusht.
Në të dyja rastet, Rusia ka reaguar me masa reciproke, duke dëbuar diplomatë maqedonas nga Moska.
Përpara dy dëbimeve të fundit, ku janë përfshirë 11 diplomatë, sipas një liste të disponueshme në faqen e internetit të Ambasadës ruse, gjithsej 19 diplomatë rusë ishin regjistruar në Maqedoninë e Veriut, duke përfshirë ambasadorin e Federatës Ruse në vend, Sergei Baznikin dhe dy zyrtarë ushtarakë.
Ambasada e Rusisë tani ka mbetur me tetë diplomatë, përfshirë ambasadorin.
