Gjykata e Kavajës ka vendosur detyrim paraqitje për 30-vjeçaren, Marsida Qatja, në banesën e të cilës mbeti i vrarë javën e kaluar 41-vjeçari, Dritan Haxholli. Qatja akuzohet për përshtatje të ambienteve për përdorim droge.
Ndërkohë më herët, pas informacioneve se Marsida Qatja do të udhëtonte jashtë vendit, Prokuroria i bllokoi pasaportën gruas. Marsida e ka pasur ritual udhëtimin një herë në muaj në Gjermani, aty ku takonte bashkëshortin e saj që ndodhet në burg.
Gjithashtu, Prokuroria i ka kërkuar Qatjas të mos flasë më në media për ngjarjen, pasi është person që ka dijeni dhe mund të rrezikojë hetimet.
Në banesën e Qatjas u vra Dritan Haxholli dhe u plagos Bledar Toçi. Ky i fundit është shefi i sigurisë së brendshme pranë burgut të Durrësit dhe ndodhet në spital në gjendje të stabilizuar shëndetësore, ndërsa Gjykata ka dhënë masën e sigurisë arrest me burg për të.
Policia ditën e krimit tha se ngjarje ka ndodhur për motive xhelozie. Por ndryshe nga deklarimet e saj para oficerëve, Qatja në media e mohoi të ketë pasur lidhje intime me Haxhollin, i cili sipas saj e shqetësonte vazhdimisht.
