Përplasjet për arsye etnike u kanë marrë jetën më shumë se 100 etiopianëve në rajonin perëndimor të Benishagul-Gumuzit.
Masakra më e madhe raportohet se ndodhi një ditë më parë kur grupe militantësh mësynë në fshatrat ku banojnë komuniteti amhara dhe qëlluan e prenë njerëzit e atyshëm, pa dallim.
Një fermer dëshmitar i ngjarjes tha se kishte numëruar trupat e 82 personave në një fushë të hapur.
Ai vetë arriti të shpëtojë me një plumb në fundshpinë ndërsa familja dhe të pesë fëmijët kishin rënë viktima të breshërisë së plumbave të militantëve.
Qeveria e kryeministrit etiopian, Abi Ahmed, njoftoi të enjten se ka arrestuar disa zyrtarë lokalë në lidhje me ngjarjen.
Mediet raportuan se mbi 40 persona të përfshirë në masakrën e një dite më parë, janë ekzekutuar nga ushtria e cila tani ka marrë nën kontroll mbikëqyrjen e rajonit.
Konfliktet etnike, ato fetare dhe përplasjet për ndarjen e tokave më pjellore mes komuniteteve, janë kthyer në normalitet për etiopianët që me fitoren e kryeministrit Ahmed në vitin 2018.
Autoritetet fajësojnë Frontin opozitar Çlirimtar të Tigreit se po nxit konfliktet në mbarë vendin, edhe pse muajin e kaluar pjesëtarët e tyre mbeten në shumicë viktima të sulmeve nga shteti.