Debatet në Konferencën e Kryetarëve pak para nisjes së seancës plenare, vijuan edhe gjatë mbledhjes së Kuvendit.
Partia Demokratike ka kundërshtuar vendimin e socialistëve që komisionet parlamentare të zhvillohen online.
Në Konferencën e Kryetarëve, PS ka kërkuar që mbledhjet e komisioneve parlamentare të bëhen online.
PD ka kundërshtuar me arsyetimin se kjo dëmton transparencën.
“Kuvendi ka hapësira për të bërë mbledhje komisionesh normalisht”, është shprehur PD. Në përfundim mazhoranca socialiste ka vendosur që mbledhjet të jenë online.
Ndërsa Sekretari i Përgjithshëm i PD, Gazment Bardhi deklaroi se mbledhja e komisioneve online është vendim antikushtetues i maszhorancës. “Ky është asgjësim i parlamentarizmit. Po tentohet t’i mbyllet goja opozitës“, tha Bardhi.
Por Taulant Balla, kreu i grupit parlamentar të PS u shpreh se puna e komisioneve do të ndahet mes online dhe në salla, sipas rëndësisë së tyre.
“Mbledhjet e rëndësishme do të zhvillohen në salla. Por do të ketë edhe komisione që do të zhvillohen online. Seancat dëgjimore do të zhvillohen fizikisht”.
Nga ana tjetër, mazhoranca dhe opozita kanë rënë dakord për të vaksinimin e detyrueshëm të deputetëve të Kuvendit të Shqipërisë.
