Nënkampionia e Europës në disiplinën e atletikës, Luiza Gega ka shënuar një tjetër sukses. Ajo ka arritur të dalë e treta në garën 3000 m me pengesa në Lojërat Olimpike Ushtarake Botërore, në Wuhan të Kinës.
Gega ka ndarë me Mapo emocionet dhe vështirësitë e hasura përgjatë garës. “Jam e kënaqur, sepse mora medaljen e parë në historinë e Forcave të Armatosura të Shqipërisë. Gara ishte vërtetë e fortë, pasi u ndesha me të njëjtët finalistë që hasa në kampionatin botëror në Doha.
Në fakt, pretendoja për vendin e dytë. E kisha vërtetë të arritshëm, por në pengesën e fundit, tek gropa e ujit, nuk më shkeli mirë këmba dhe për pak u rrëzova. Bëra një ndalim të vogël, që më penalizoi në sekonda”-është shprehur Luiza.
Në vend të dytë të Lojërave Olimpike Ushtarake Botërore, është pozicionuar sllovenia Mismas Marusa. Sa i takon medaljes së artë, është rrëmbyer nga Katari, që u përfaqësua nga Yavi Winfred.
Lojërat nisën ditën e mërkurë, me 100 pishtarë që rrugëtuan përmes liqenit lindor Greenway. Presidenti kinez Xi Jinping u shpreh në nisje të garës 10 ditore se fuqia e sportit mund të sherbejë si një urë komunikimi midis kulturave të ndryshme.
Lexo edhe: