Mediat amerikane raportojnë se avioni Boeing 737 i “Ukraine Airlines” që u rrëzua në Teheran natën e sulmit iranian në bazat amerikane në Irak u godit gabimisht nga një raketë kundër-ajrore. Gazeta “Newsweek” dhe rrjeti CBS citojnë 3 burime të rëndësishme për këtë lajm, një nga Pentagoni, një nga inteligjenca amerikane dhe një tjetër nga shërbimet sekrete irakiane. Në këtë tragjedi ajrore humbën jetën 176 persona që ndodheshin në bordin e avionit.
Newsweek është e para që raportoi hipotezën për një raketë që goditi avionin, ndërsa CBS, citon burimet e inteligjencës amerikane që kishte regjistruar sinjalet e dy raketave SA-15 të lëshuara nga iranianët, të cilat më pas u pasuan nga një shpërthim. Megjithatë të gjitha burimet thonë se avioni u godit gabimisht.
Në vijim të hetimeve për gjetjen e arsyeve të rrëzimit të avionit pak minuta pas ngritjes së tij nga aeroporti i Teheranit, Ukraina kishte bërë me dije se nuk përjashtonte mundësinë që mjeti ajror të ishte rrëzuar nga një raketë anti-ajrore. Kievi, gjithashtu, nuk përjashton që ngjarja të jetë dhe një akt terrorist. Këto janë aktualisht dy hipotezat kryesore, duke shtuar dhe atë të problemit teknik në motor ose përplasjes së avionit me një dron.
Sipas Organizatës iraniane të Aviacionit Civil, avioni Boing 737 mori flakë në fluturim e sipër përpara se të përplasej dhe të shpërthente. Në këtë deklaratë lexohen dhe dëshmitë e disa personave që kishin parë avionin të merrte flakë.
