Prej se deklaroi largimin nga politika aktive, pra jo vetëm nga detyra e zv-kryeministrit, por nga angazhimi 24 vjeçar, siç u shpreh, Erjon Braçe ka lëshuar disa mesazhe të koduara, në faqen e tij në Facebook.
Ato janë bërë edhe lajm në portale, dhe ndjekësit e tij në rrjet social duket se i kanë kapur këto thirrje.
Disa i thonë me keqardhje që iku edhe i fundit socialist, disa të tjerë bëjnë ironi dhe madje e ftojnë edhe të luajë me ta domino të xhamlliku.
Mesazhi më i fortë është ai me foton e asaj që njihet si Kalaja Dibrane, që Braçe postoi në FB, pas lëvizjeve dhe ndryshimeve që bëri Edi Rama në qeveri dhe parti.
Ish-zv-kryeministri e shoqëroi me shënimin; tashmë edhe stil jete.
Thelbi i këtij reagimi, besohet se ka të bëjë me gjendjen në PS dhe në rilindje, ku sipas Braçes tashmë mesa duket disa po shkojnë larg mbi kurrizin e të tjerëve. Dhe në krye, është shefi që kundron këtë luftë, me një lloj kënaqësie.
Por një shigjetë jo pak e helmët ka ardhur nga deputeti i Lushnjes pasditen e 2 shtatorit, pas befasive të Asamblesë.
Ai ka nxjerrë një perendim dielli, po jo rastësisht e ka kapur në një kënd ku duket tabela e një bankomati.
Braçe me siguri ka dashur të thotë se paraja tashmë çan jo vetëm detin, po edhe partinë.
Erjon Braçe duket sikur ka nisur sezonin e pakënaqësisë dhe kritikave me të tijtë, 4 vite pasi shërbeu si numri dy i qeverisë, dhe ku firmosi çdo vendim, në mungesë dhe me porosi të Kryeministrit.
Kjo të bën të mendosh se pak gjëra parimore ka në këto “sulme”. Më shumë duhet të jetë një revoltë emocionale, pasi Rama lau duart me të, me gjasë edhe prej rezultatit të dobët në zgjedhjet e 25 prillit në qark, e sidomos në Bashkinë e Lushnjes.
