Presidenti Ilir Meta ka reaguar pasi Kuvendi votoi për shkarkimin e tij nga posti i kryetarit të shtetit. Meta ka zgjedhur të publikojë një gafë të deputetit të opozitës Selami Jenishehri, i cili shprehu gjithashtu votën e tij pro për shkarkimin.
“Të dashur miq, ju uroj një pasdite të qetë, relaksuese dhe të qeshur duke ju përshëndetur të gjithëve me këtë thënie frymëzuese!,” shkruan Meta, ndërsa i referohet Jenishehrit i cili tha sot në Kuvend se “do t’i dalin për zot nipërave dhe mbesave pensionistë”.
Kuvendi ka miratuar sot shkarkimin e kreut të shtetit me 104 vota pro, 7 kundër dhe 3 abstenim. Në votime morën pjesë 115 deputetë. Sipas nenit 88 të Kushtetutës, kërkohet që shkarkimi i Presidentit të Republikës të marrë jo me pak 94 vota ose 2/3 e të gjithë deputeteve.
Meta bëhet presidenti i parë i shkarkuar i Shqipërisë në epokën 30-vjeçare që kur Shqipëria rrëzoi komunizmin 50-vjeçar dhe i hapi rrugë tranzicionit demokratik.
Seanca e ditës së sotme dhe votimi si rrjedhë e saj, do ta lërë topin në fushën e Gjykatës Kushtetuese për të vendosur nëse gjetjet e Parlamentit, për shkelje të Kushtetues nga Ilir Meta, janë të bazuara apo jo.
Një tjetër vendim i Kushtetueses është edhe nëse këtë çështje do e cilësojë prioritare dhe do e shqyrtojë jashtë radhe, apo do vendoset në radhë pritjeje, bashkë me 180 çështje të tjera që pritet të gjykohen.
