Prokuroria e Posaçme kundër Krimit dhe Korrupsionit (SPAK) ka reaguar pas deklaratës së gazetarit Artan Hoxha, në lidhje me dëshminë e Nuredin Dumanit, ku përfshinte edhe presidentin Ilir Meta.
Në emisionin “Opinion”, Hoxha tha mbrëmjen e së enjtes, se në një nga dëshmitë e tij, Nuredin Dumani ka thënë se Ilir Meta ka porositur vrasjen e Aleksandër Ndokës, vëllait të ish-deputetit të Partisë Socialiste Arben Ndoka.
SPAK, në një reagim publik, përgënjeshtron deklaratën, duke u shprehur se “Dumani nuk ka deklaruar asnjë të dhënë në lidhje me Presidentin e Republikës së Shqipërisë”.
Më tej, iu bën thirrje mediave që të jenë më të kujdesshme, të respektojnë viktimat dhe familjarët, si dhe faktin që çështja është në hetim.
Reagimi i SPAK:
Në vijim të interesimit të shtuar të mediave, në lidhje me deklarimin e gazetarit Artan Hoxha për sa i përket të dhënave të pretenduara si të deklaruara nga shtetasi nën hetim N.D. për Presidentin e Republikës së Shqipërisë, të transmetuar në televizionin Kombëtar “Klan”, në emisionin “Opinion” të datës 02.06.2022, sqarojmë opinionin publik se:
Në deklarimet e dhëna në kuadër të procedimit penal nr.75/2022 që po heton Prokuroria e Posaçme, shtetasi nën hetim N.D., nuk ka deklaruar asnjë të dhënë në lidhje me Presidentin e Republikës së Shqipërisë.
Duke marrë shkas nga ky rast, si dhe duke mbajtur në konsideratë edhe trajtimet që i janë bërë deklarimeve të shtetasit N.D. në emisione të ndryshme televizive, ftojmë mediat që të jenë të kujdesshme, të mbajnë në konsideratë ndjeshmërinë e kësaj çështje, të respektojnë viktimat dhe familjarët e tyre, si dhe faktin se çështja është në fazën e hetimit paraprak dhe Gjykata e Posaçme e Shkallës së Parë Për Korrupsionin dhe Krimin e Organizuar referuar nenit 103 të Kodit të Procedurës Penale ka vendosur ndalimin e publikimit të vendimit nr.42 datë 17.05.2022 (me objekt caktimin e masave të sigurimit).
