Pas publikimit të videos virale në rrjet, ku infermieret në “Shtëpinë e të Moshuarve” në Pejë, dhunojnë një prej pacienteve, vjen dhe reagimi i Ministrisë së Brendshme të Kosovës.
Ministri i Brendshëm i Kosovës Xhelal Sveçla i ka konsideruar të rënda veprimet e kujdestareve që kanë dhunuar në mënyrë makabre të moshuarën në Qendrën për të Moshuar “Orenda” në Pejë.
Në një reagim zyrtar, Sveçla shkruan se të gjithë të përfshirët në këtë ngjarje të rëndë do të dalin para drejtësisë.
Reagimi i plotë:
Me shqetësim kemi parë të gjithë pamjet e keqtrajtimit të një gruaje të moshuar nga një grup vajzash, në një shtëpi të përkujdesjes së të moshuarve në Pejë.
Veprime të tilla të dhunës janë të papranueshme kudo që ndodhin, por në veçanti janë më të rënda kur ndodhin brenda institucioneve që konsiderohen të ofrojnë ndihmë dhe përkujdesje.
Nga Policia e Kosovës jam njoftuar që deri më tani janë arrestuar dy nga dhunueset dhe hetimet po vazhdojnë. Fuqishëm bëj thirrje për sjelljen para drejtësisë të të gjithë personave të implikuar në këtë akt çnjerëzor. Një ngjarje e rëndë ndodhi në shtëpinë e të moshuarve në Pejë.
Në pamjet e publikuara në rrjetet sociale, shihet se si disa punonjëse të kësaj shtëpie sulmonin fizikisht një grua të moshuar, derisa njëra prej tyre është treguar e pamëshirshme duke e goditur me shuplaka vazhdimisht. Policia njoftoi se arrestoi dy të dyshuarat e përfshira në këtë rast për të cilat do tё merren veprime të mëtejshme.
Aurona Pelaj është kujdestarja që duket në videon e rëndë që demonstron dhunën e ushtruar ndaj të moshuarës në shtëpinë e të moshuarve në Pejë.
Ajo është vajza që duket qartë në video teksa rreh të moshuarën dhe e tall. Ndërsa koleget e filmojnë dhe qeshin. Këtyre të fundit nuk u janë zbardhur ende identitetet. Pelaj është vënë në pranga bashkë me një tjetër person, ndërsa dy punonjëst e tjera në shtëpinë e të moshuarve në Pejë janë vënë nën hetim.
