Bronshiti dhe katarret e rrugëve të frymëmarrjes është një sëmundje që shkaktohet si rezultat i veprimit të ftohtit mbi mbulesat mukoze të rrugëve të sipërme të frymëmarrjes.
Paraqitet me rrufë, djegie të hundës dhe fytit, dhimbje gryke, kollë të thatë, ngjirje të zërit, ngritje e lehtë e temperaturës, dhimbje të muskujve të gjoksit dhe shpinës, ulje oreksi.
Bronkiti është mahisja e mprehtë ose kronike e mukozës së bronkeve dhe prek të gjitha moshat, por veçanërisht moshat e vogla, pleqtë dhe ata që abuzojnë me duhanin dhe alkoolin.
Bronshiti i mprehtë shfaqet më shumë në stinët e ftohta. Të ftohtit luan rol ndihmues në shfaqjen e sëmundjeve, por edhe një ndër faktorët e rëndësishëm është edhe astma bronkale, mungesa e vitaminës A, mbilodhja, pamjaftueshmëria e punës së zemrës etj.
Sëmundja fillon përnjëherësh me ngritje të temperaturës, me keqësim të gjendjes së përgjithshme, ulje të oreksit, dhimbje të kokës.
Kolla fillon që në shenjat fillestare të sëmundjes. Ditët e para është e thatë, më vonë bëhet me gëlbazë, si dhe ka dhimbje të lehta prapa dërrasës së kraharorit.
Për këto të sëmurë ka regjim shtrati, ku dhoma të ajroset shpesh. Ajri nuk duhet të jetë i thatë. Ndalohet pirja e duhanit brenda në dhomë. Ushqimi të jetë i lehtë dhe i gjithanshëm si: qumësht, vezë, zarzavate, fruta dhe perime. Diagnoza e saktë vendoset vetëm nga mjeku specialist.
Merrni 5-6 gjethe të thara e të grimcuara të dafinës, lëkurën e 1-2 kokrrave limoni ose portokalli dhe hidhni në 1 litër ujë të sapovaluar. Ena lihet e mbuluar 10 min, pastaj kullohet. Pihet 1 gotë 2-3 herë në ditë.
Merrni 2-4 gr gjethe të thara arre. Lihen për 12 orë në 150 gr verë të bardhë dhe e kullojmë. Pihet esëll në mëngjes. Pastaj merrni 1 kg thelpinj bajamesh të thata, thërrmohen dhe përzihen me 1 kg mjaltë. Në çdo vakt hahet nga 1 lugë gjelle.
Merrni 10 gr rigon, 100 gr lëkurë vidhi, 100 gr lende lisi. Këto i ziejmë me 1 kg ujë derisa të shterojnë e të mbetet 500 gr nga ky lëng. I sëmuri pi 3 gota të vogla rakie në ditë.
Sherebela ka dhënë rezultate të mira në ftohje e pleurite te njerëzit që kanë djersë të vazhdueshme. Merrni 1 lugë gjelle me sherebelë të tharë e të grimcuar, hidhet në 1 gotë ujë në momentin e valimit dhe lihet 5-7 min.
Kullohet dhe pihet 3 herë nga 1 gotë uji me çaj të ngrohtë para buke, e ëmbëlsuar me mjaltë sipas dëshirës.
