19 viktima dhe 1 mijë e 71 infektime u regjistruan gjatë 24 orëve të fundit.
Shefi i Laboratorit të Mikrobiologjisë në QSUT, Andi Koraqi thotë se ndër arsyet e rritjes së infektimeve janë virozat si dhe mundësia e qarkullimit të varianteve të reja të COVID-19.
“Gjatë gjithë sezonit të virozave respiratore sigurisht që situata do të jetë më e rëndë, për faktin e kombnimit të Covid-19 me virozat e tjera respiratore”– thotë mjeku, Koraqi.
Edhe pse numri i të prekurve çdo ditë është mbi 1 mijë, mjeku Andi Koraqi sqaron se virusi nuk është agresiv.
“Kemi shtim të rasteve, por jo agresivitet më të madh të virusit. Kjo nuk është e thënë vetëm nga ne, por është e pranuar nga të gjithë. Si pasojë e shtimit të rasteve do të kemi më shumë sëmundshmëri, do të kemi edhe grupmosha më të mëdha që janë të futura në këtë prekshmëri të virusit”– shton ai.
Gjatë orëve të fundit në spitalet e dedikuara për trajtimin e koronavirusit janë shtruar edhe 24 pacientë të tjerë duke e çuar numrin e përgjithshëm të tyre në 618.
I vetmi tregues në gjithë panoramën shqetësuese të pandemisë është numri i të shëruarve. Autoritetet shëndetësore njoftojnë se orët e fundit janë rikuperuar 930 qytetarë.
