Edhe në Shqipëri do të ndalohet fluturimi i avionëve Boing 737-8 dhe 737-9 Max, pas aksidentit fatal që ndodhi me një tip të këtij aeroplani me shoqërinë ajrore “Ethiopian Airlines”, ku humbën jetën 157 persona.
Autoriteti i Aviacionit Civil Shqiptar e ka bërë publike këtë masë përmes një njoftimi për shtyp, ku sqaron se kërkesa erdhi nga Agjencia Europiane e Sigurisë në Operim të Aviacionit, e cila ka pezulluar udhëtimet me këto dy tipa aeroplanësh. Ndalimi i fluturimit të avionëve të këtij tipi do të jetë pa afat, deri në daljen e një konkluzioni shkencor lidhur me defektin që shkaktoi tragjedinë e të dielës.
Në Shqipëri nuk ka asnjë avion të tipit Boeing 737-8 dhe 9 Max që kryen fluturime, ndërsa vetëm një nga kompanitë që kryejnë fluturime në aeroportin tonë ka në pronësi 11 të tillë. Por edhe pse Aviacioni Civil thotë se në Shqipëri nuk operon asnjë avion i tillë, një Boing 737-8 Max u ul në Rinas para rreth dhjetë ditësh, siç tregon një foto e Mapo.al.
Interesant është fakti se Aviacioni Civil Shqiptar, në vend që të shqetësohet kaq shumë për sigurinë e fluturimeve për një mjet që më pas thotë se nuk operon në Shqipëri, duhet të kujdeset më shumë për sigurinë e fluturimeve dhe cilësinë e vetë kompanisë.
Problem i madh mbetet siguria e fluturimeve, pasi janë regjistruar disa incidente me avionët që prekin Rinasin, mes tyre ai me një mjet që u mbush me tym gjatë fluturimit.
Shumë pasagjerë ankohen vazhdimisht për vonesat dhe cilësinë e shërbimit, por ankesat bien në vesh të shurdhër. ACSH duhet të shohë dhe problemin e certifikimit të njerëzve që punojnë për të.
