Një moment historik për vendin me shumicë katolike. Pas shumë debatesh, senatorët votuan pro abortit pas një seance maratonë në Parlament. Me 38 pro, 29 kundër dhe një abstenim, aborti bëhet tashmë i ligjshëm në Argjentinë.
Turma masive të aktivistëve u mblodhën jashtë Pallatit të Kongresit Kombëtar, dhe e përshëndetën lajmin me brohoritje të forta – në disa raste, pati edhe lot gëzimi.
Gabriela Giacomelli, dy motrat e së cilës abortuan në mënyrë të paligjshme, e cilësoi 30 dhjetorin një ditë “shumë emocionuese”.
“Ne kemi luftuar me vite”, – tha Giacomelli. “Unë shoh të rinjtë tani, megjithëse shpresoj se kurrë nuk do të duhet të abortojnë, por nëse e bëjnë tani ata mund ta bëjnë në mënyrë të sigurt.”
Një tjetër aktiviste për të drejtat e abortit, Sofia Gonzalez, tha se ajo besonte se e mërkura ishte një “moment historik” për Argjentinën. “Duke filluar nga sot, unë besoj se gjithçka ndryshon”, – shtoi ajo.
Aborti lejohej vetëm në raste të përdhunimit ose kur shëndeti i nënës ishte në rrezik. Tani, do të praktikohet deri në javën e 14-të të shtatzënisë nga të gjitha nënat që nuk duan të lindin.
Projektligji u miratua nga Dhoma e Deputetëve pak javë më parë. Lidhur me këtë ligj, aktivistët kanë bërë një fushatë kombëtare që ka zgjatur për vite me radhë.
Presidenti Alberto Fernandez e shfrytëzoi këtë kërkesë për fushatë, teksa u rreshtua si mbështetës i abortit.
