Ministri i Brendshëm Sandër Lleshaj dhe deputeti i Opozitës Parlamentare, Myslim Murrizi janë përplasur verbalisht në seancën e sotme plenare për ligjin e Policisë.
Pasi Murrizi i tha Lleshajt të mos bëjë “show” me deputetët përmes uniformave blu, ministri iu kundërpërgjigj nga foltorja se ata janë të parët që duhet të japin llogari para ligjit.
Lleshaj theksoi më tej se nuk mund të bëhet politikë me këtë autoritet ligjzbatues, dhe risolli madje në vëmendje edhe origjinën e tij, kur paralajmëroi Murrizin për tonin e lartë, duke lënë shijen e një kërcënimi publik.
****
Myslym Murrizi: Tre ministra në 30 vite, z.Lleshaj, kanë tentuar të bëjnë paradë dhe show me deputetët. Dy kanë ikur si sëpata pa bisht. Njëri që kërkonte të hiqte xhamat e makinave në oborr të Kuvendit, tjetri që bënte videoklip duke gjëmuar makinën e ministres Kodheli se gjoja nuk kishte rryp shoqëruesi, dhe akti i turpshëm juaj, i Ministrisë apo i drejtorit tuaj të policisë, shoferit dhe taksistit të Balilit, ishte ndëshkimi në derë të Kuvendit dhe prurja e policisë si në kohë të monizmit, të 2-3 deputetëve për të dërdëllisur para qytetarëve që ju që nuk pyesni për deputetët nuk ju bie mendja për qytetarët. Jeni shumë të vegjël për ta bërë këtë dërdëllisje, si ti, si ai shoferi i Eskobarit.
Myslym Murrizi ndërhyn nga vendi
Sandër Lleshaj: Unë krahasohem vetëm me veten time dhe nuk besoj që mund të më bëni krahasime me asnjë njeri. S’e keni as atë tagër. Duhet t’ju them që policia nuk ka asnjë objekt të merret me deputetët, por policia as nuk njeh ndonjë hierarki përballë ligjit. Përballë ligjit, besoj që deputetët janë ata të parët që duhet të japin llogari.
Myslym Murrizi ndërhyn nga vendi
Sandër Lleshaj: Jam ministër dhe po të them, në qoftë se ti kërkon të bësh politikë e të fitosh pikë me policinë, harrojë që mund të fitosh. As dua të jem i ngjashëm me ty. Polic ke qenë dhe polic ke mbetur. Po mos kujto se mund të fitosh pikë përballë policisë. Je polic, ke qenë polic dhe ke dështuar në policinë financiare dhe po të them që harroji këto intimide ndaj policisë. Zbatoje ligjin sepse përballë ligjit ti je askushi.
Myslym Murrizi ndërhyn nga vendi
Sandër Lleshaj: Mos u përpiq të trashësh zërin sepse e ke organikisht të pamundur ta trashësh, sidomos me mua. Ti s’e di se nga jam unë more?!
Etiketa: Myslym Murrizi, parlament, Sandër Lleshaj, Video
