Moti i keq, me temperatura të ulëta si dhe me reshje dëbore të dendura ka sjellë problem në aksin rrugor Vlorë-Himarë në Qafën e Llogarasë. Si gjithnjë ky aks është i vetmi në Vlorë që sjell shqetësime për përdoruesit e rrugës, pasi reshjet e dendura, akulli në rrugë si dhe pjerrësia e këtij aksi sjell gjithnjë problem për drejtuesit e automjeteve. Mbrëmja e djeshme ka sjellë dhe bllokimin e këtij aksi rrugor me një gjatësi prej 10 km, nga Sorkadhja, vendi që fillon dhe pjerrësia më e madhe, deri te Pisha Flamur. Aksi ka qenë i pakalueshëm për automjetet për disa orë, pasi trashësia e dëborës i kalonte të 20cm. Po ashtu moti me temperatura të ulëta ka sjellë dhe erëra të fuqishme në bregdetin e Vlorës. Prej orëve të para të ditës, erërat e fuqishme që shkonin deri në 25 m/s kanë bërë që dhe fuqia e detit të shkojë deri në gjashtë ballë në gji si dhe në det të hapur deri në 8 ballë. Anijet e mallrave, të cilat kanë qenë në mol të ankoruara, kanë dalë në det, “ rad” për të mos u përplasur me kalatat e molit, po ashtu dhe peshkarezhat, janë grumbulluar në Tri Port deri në përmirësimin e kushteve të motit. Dhe trageti i Linjës Vlorë-Brindisi është nisur me shumë vonesë, pasi fuqia e detit ka vënë në dilemë marinarët e tragetit.
