Kryeministri Edi Rama ka sqaruar mungesën e një përfaqësuesi të opozitës në Konferencën e Parë Ndërqeveritare në Bruksel.
Por ai tha se nuk e di se kush është opozita në Shqipëri.
“Me një format të përcaktuar nga Komisioni për gjithë trupën që do të përfaqësonte Shqipërinë në tryezë. Natyrisht mund të kishim kërkuar një ndryshim për të ftuar një përfaqësues apo dhe më shumë se një nga ana e opozitës, por kemi një problem që nuk është një problem i Brukselit dhe jo për t’u trajtuar aty se ‘kush është kush’ në anën e opozitës.”, tha Rama.
Pjesa ceremoniale e tryezës së hapjes hapjes së negociatave mes Shqipërisë dhe BE-së në Bruksel zgjati rreth 40 minuta. Nga këto 21 minuta folën ministri i jashtëm çek, si kryesuesi i Presidencës, Shefi i politikës së Jashtme në Bashkimin Europian Josep Borrell dhe Komisioneri për Zgjerim Oliver Varheley, ndërsa 19 minuta kryeministri Edi Rama.
Megjithatë pati një minutazh të gjatë për të folur, kreu i qeverisë preku në fjalimin e tij gjithçka, që nga lufta në Ukrainë, sulmi kibernetik nga një vend armiqësor, reforma në drejtësi, madje edhe bashkëpunimi me shoqërinë civile dhe lirinë e medias.
“Ne jo vetëm që do të vazhdojmë të raportojmë periodikisht për negociatat në Parlament dhe Këshillin kombëtar për Integrimin Europian, por do të gjejmë mënyra me ndihmën tuaj për të rritur cilësinë e këtyre proceseve duke përmirësuar ndërveprimin me shumë aktorë të ndryshëm. Në të njëjtën kohë do të punojmë që kritika e shoqërisë civile dhe liria e mediave të vazhdojnë të inkurajohen në mënyrë që qytetarët të mbeten të vetëdijshëm dhe vigjilentë sa qeveria që përpiqet të jetë për sfidat dhe mundësitë e kësaj rruge të re drejt anëtarësimit në BE”, tha Rama.
