Mapo Letrare

Muzgje që s’perëndojnë








Bëni LIKE faqen zyrtare në Facebook
               Publikuar në : 20:49 - 28/11/20 |
Nga Ndue Dedaj

Cikel poetik 



GJUHA


Banon gjuha në ne




Banojmë ne në gjuhën.



Pejzat e saj kemi frymë,


Palcën e saj himn.

Banojmë ne në gjuhën

Banon gjuha në ne.

 

QAFA E MALIT

Bjeshkënaja kishte orakullin e vet,

nuk ishte një lis,

një ah, një pishë.

Ishte një njeri

që farën e qiellit

e kishte mbjellur në tokë

e farën e tokës në qiell.

 

SHKUMËSI

Shkruan mbi guva malesh prej epokës së gurit

Vizaton piktograme, gdhend petroglife –

Dërrasën e zezë e bën të bardhë.

Mësuesit, pluhuri i bie mbi çerpikë

Si frulliza e dëborës mbi pemë –

Shkumësi, miniera e parë e njeriut.

 

PËRROI I THATË

U tha prej lotëve të gjyshës sime

kur mbuloi nën dhé fëmijën e nëntë

të barkut të saj.

Atëbotë

legjenda e Ajkunës u zhbë.

 

MILLOSH KOPILIQ KRYEPREMI

Ia mora pushkën e gjatë nga dora

Boll me këtë “teshën” e çmendur krahaqafë.

Bëj paqe me veten…

Për tën’Zonë!

 

Tash je pa krye e s’të ka më kuptim lufta,

S’bën me qenë prap’ dashnor i pushkës!

Por Millosh Kopiliq Kryepremi

S’bësonte në mua…

 

SHESHI PARA KRYEMINISTRISË

Kemi lëshuar në këtë copë asfalt

Pëllumba që janë ngritur me përtesë në ajër.

Kemi qeshur në këtë shesh, kemi qarë,

Sa herë këtu na janë marrë mendtë!

Kemi ngadhënjyer në këtë bulevard!

Jemi fundosur si në një det të trazuar

Titaniku ynë sa herë është mbytur këtu!

Itakë ka qenë për ne ky shesh! Arenë…

Mekë, ky bulevard, pa vija të bardha.

Kanë ikur prej këtu zogjtë nga pemët

Janë strukur në shkrepa të lartë pikëllimi,

Në pritje të lirisë së këtij tempulli

Nga djajtë brenda nesh, marrë peng…

Ky shesh – loti ynë i ngrirë në sy

Prej plumbave që kemi lëshuar

Kur na janë mbaruar pëllumbat….

 

TELEFONI IM

Nuk i bie telefonit tim asnjë ministër, deputet

Asnjë njeri i fuqishëm, me poste, pará, pushtet,

E unë nuk dëshpërohem aspak

Për kacagjelët që më shohin nga lart!

Ata problemin e kanë me pasqyrën.

 

BOTA

Avionët kryqëzohen sipër tokës,

përshëndetën me fjalë diejsh e shirash –

bota është aq e madhe.

në qytetin tim kët’ të dielë vjeshte

nuk tepruar askush për të pirë kafe me mua –

bota është aq e vogël…

 

TRINIA E KOHËS

Ishte një kohë kur e lija prapa kohën

vraptar rinor drejt së panjohurës,

buzëqeshte ajo si një gjyshe e urtë

tek shihte hapat e mi agut me ngut.

Erdhi një kohë e mesme e nxehtë

tashmë ajo ishte bërë grua e unë burrë

ziheshim mesditës, cili të kalonte i pari,

as më hapte, as i hapja udhë.

Po troket një tjetër kohë tërmales

me fytyrën e një vashe vraptare,

përditë e më tepër më le prapa në muzg,

as e kuptova, as më kuptoi kurrë.

 

PIKTURA E NUMRAVE

Nuk ishin numrat për mua

në aritmetikën time, një plus një s’bëjnë kurrë dy!

Llogari pa logjikë, logjikë pa matematikë?…

roj numrat si zogjtë në hapësirë

si hapat e parë të fëmijës

si muzgje që s’perëndojnë.

Ju që rrotulloni botën si Galileu

e bashkë me të dhe mua, më ndjeni!…

S’isha nxënës i denjë për Euklidin, Pitagorën

Por zoti është gjithnjë bujar

për mua kishte krijuar

algjebrën e shpirtit…

 

KUFIRI

Piramida të bardha, lyer me gëlqere

Sakaq visheshin si gratë në zi!…

Vija e kufirit mblidhej si lak në qafë

Dhe binte, binte shi.

 

GJURMËT

Qysh se kali i Gjergjit të betejave

Kërceu nga maja e malit e ra në fushë

Gjurma e tij u ngul në dorën time si patkua…

Pëllëmbët e mia, si dy gjurmë kali.

 

REBUS LIRIK

ti shkon anës së tejme me veten

unë anës së këndejme me vetveten,

prandaj s’jemi një

s’jemi dy,

jemi ne…

 

 

LULEMOSPREK

Pylli fërshëllen melodinë e buzëve të saj,

hap një udhëz të kalojë

vasha e shtatë mrizeve,

e brishtë … lulemosprek!

 

KOLEKSION

I dua koleksionet

e pikturave, pullave postare,

numizmatikës, makinave,

lodrave të fëmijëve –

me gjith’ madhështinë e topave

në kalanë e Gjirokastrës,

i vetmi që nuk dua,

koleksioni i armëve.

1


Etiketa:

CLOSE
CLOSE
Pas