Shefja e Shërbimit Infektiv, Najada Çomo, bëhet e para në Shqipëri që vaksinohet kundër pandemisë Covid-19.
Çomo mori dozën e parë të Pfizer në stadiumin “Air Albania”, aty ku janë vendosur 60 stacione vaksinimi.
Kryeministri Edi Rama ishte i dyti në radhë për vaksinën anti-Covid. Ai u pasua nga mjekët Pëllumb Pipero dhe Tritan Kalo.
Imunizimi i bluzave të bardha dhe kreut të qeverisë u sigurua nga stafi mjekësor pasi plotësuan formularin shëndetësor, me pyetje nëse kanë udhëtuar jashtë vendit dhe kanë bërë tamponin për Covid.
Gjithashtu pritet të vaksinohen mjekë, infermierë, policë, si dhe të moshuar.
Shqipëria ka siguruar deri më tani 975 vaksina, ndërsa në javën e tretë të janarit pritet të mbërrijnë në vend 10 mijë doza.
Nuk dihet ende shteti i BE-së që ka kontribuar për marrjen e vaksinave të para pasi ka kërkuar konfidencialitet, sipas kryeministrit Rama.
Kreu i qeverisë ka deklaruar se në total Shqipëria ka siguruar 500 mijë doza vaksine.
