Në Las Vegas u mbajt mbrëmjen e së dielës edicioni i 64 i ndarjes së çmimeve muzikore “Grammy”.
Çmimet kryesore u shpërndanë mes një numri fituesish, duke përfshirë Jon Batiste, Silk Sonic dhe Olivia Rodrigo. Fituesi kryesor i natës ishte Jon Batiste, i cili mori pesë çmime.
Në një grup prej 10 pretendentësh, Batiste fitoi albumin e vitit për “We Are”. Gjithashtu ai fitoi titullin për performancën më të mirë, këngën më të mirë, kolonën zanore më të mirë dhe videoklipin më të mirë për “Freedom”.
Nga mikrofoni, Batiste, një aktivist social, muzika e të cilit është përshkruar si pozitive dhe emocionuese, tha se artet janë subjektive dhe njerëzit i arrijnë në një moment të caktuar.
“Nuk ka muzikant më të mirë, artist më të mirë, kërcimtar më të mirë, aktor më të mirë”, deklaroi ai. “Artet krijuese janë subjektive dhe i arrijnë njerëzit në një moment të jetës së tyre kur ata kanë më shumë nevojë. Është sikur të krijohet një këngë apo një album dhe pothuajse ka një radar për të gjetur personin kur i nevojitet më shumë.”
Muzika, shtoi Batiste, i cili luan në piano që në fëmijëri, ishte më shumë se argëtim apo profesion. “Për mua,” tha ai, “është një praktikë shpirtërore.”
Rikthimi i Silk Sonic i dha 4 çmime: regjistrimi i vitit, kënga e vitit, performanca më e mirë R&B dhe kënga më e mirë R&B.
Këngëtarja Olivia Rodrigo mori çmimet për artisten e re më të mirë, albumin më të mirë vokal pop dhe performancën më të mirë solo pop.