Legjenda e futbollit kroat, Miroslav Blazevic u nda nga jeta këtë të mërkurë në moshën 87 vjeçare. Dy ditë para ditëlindjes së 88-të, Blazevic nuk i mbijetoi sëmundjes së rëndë nga e cila vuante prej 2011.
Blazevic u diagnostikua për herë të parë me kancer të prostatës në vitin 2011, por e luftoi sëmundjen e egër. Një vit pas kësaj, ai u operua nga melanoma. Në shtator 2019, sëmundja iu rikthye sërish trajnerit dhe për fat të keq e mposhti këtë mëngjes.
I lindur në Bosnjë dhe Hercegovicnë, Blazevic luajti dhe drejtoi shumë skuadra në ish shtetin jugosllav dhe në Zvicër. Suksesin më të madh ai e arriti në drejtimin e kombëtares kroate në vitin 1996, ku doli në çerekfinalet e Evropianit, teksa dy vite më vonë në Kupën e Botës në 1998 siguroi vendin e tretë.
Blazevic e mbylli karrierën në vitin 2015, teksa ka marrë edhe titullin “trajneri i trajnerëve”. Kroati në vitet 1985-1987 drejtoi edhe skuadrën e Prishtinës në Kosovë.
