Moti do vijojë të jetë i acartë në të gjithë Shqipërinë edhe ditën e sotme, e diel, 24 shkurt. Pritet që temperatura nën zero dhe ngrica të ketë në të gjitha qarqet. Instituti i Gjeoshkencave, Energjisë, Ujit dhe Mjedisit ka bërë parashikimin e motit për sot ku vërehet se reshjet do të pushojnë, por temperaturat do jenë nën zero. Sipas MeteoAlb, temperaturat e ajrit do të ulen sërisht lehtë duke luhatur vlerat ekstremale ditore nga -12 °C në zonat malore deri në 11 °C mesdita në Jugperëndim të Shqipërisë.
Parashikimi i motit:
Reshjet
Gjatë mbrëmjes priten reshje të dobëta, respektivisht për secilin qark. Reshje të dobëta dëbore mbi 600m mbi nivelin e detit (por në zona shumë të kufizuara dëbora mund të shfaqet edhe më poshtë sesa ky nivel përfshirë edhe perëndimin e vendit), kryesisht si dëborë e përzier me shi. Sa i takon ditës së diel, 24shkurt nuk priten reshje.
Temperaturat
Të dielën temperaturat minimale dhe maksimale të ajrit pritet të arrijnë:
në bregdet: -1 / 11 °C
në vendet e ulëta: 0 / 8°C
në vendet malore: -12 / 2 °C
Era
Të dielën era pritet të fryjë mesatare deri e fortë në pjesën më të madhe të territorit, sidomos në Veri dhe në bregdet.
/Gazeta Mapo/
