Ashtu siç ka bërë për çdo protestë apo ngjarje ku parashikohen trazira, ambasada e SHBA në Shqipëri ka paralajmëruar shtetasit e saj për ndeshjen e Conference League.
Në njoftimin e publikuar në faqen zyrtare të SHBA-së, Ambasada këshillon personelin dhe qytetarët amerikanë që të shmangin qendrën e Tiranës për shkak të turmave të mëdha të tifozëve që mund të shkaktojnë trazira.
“Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit. Ambasada e SHBA-së këshillon fuqimisht qytetarët amerikanë dhe personelin e ambasadës amerikane që të shmangin qendrën e Tiranës dhe zonën e Stadiumit të mërkurën më 25 maj. Për shkak të turmave të mëdha që priten në Tiranë, ju lutemi bëni kujdes në të gjithë qytetin dhe jini të vetëdijshëm për rrethinën tuaj. Shmangni tubimet e mëdha dhe çdo zonë ku demonstratat janë të pashmangshme ose në vazhdim. Jini të vetëdijshëm për rrethinën tuaj. Monitoroni mediat lokale për përditësime. Mbani një profil të ulët”, thuhet në njoftimin e Ambasadës së SHBA-së.
