TIRANË – Policia e Tiranës ka arrestuar nipin e Prel Markut për vrasjen e Hekuran Billës me 11 qershor në kryeqytet. I arrestuari është identifikuar si Sebastian Mali, 22 vjeç. Në kërkim është shpallur Viktor Marku, si autor i dyshuar i ngjarjes.
Mësohet se Sebastian Mali është identifikuar nga kamerat e sigurisë, teksa ndiqte lëvizjet e viktimës përpara atentatit te Komuna e Parisit. Hekuran Billa u qëllua me breshëri plumbash me silenciator brenda në automjetin e tij BMW X6 me targa angleze, duke humbur jetën në vend.
Pas ngjarjes, autorët dogjën automjetin në Pezë, ndërsa brenda në makinë u gjet edhe arma e krimit.
Njoftimi i Policisë
Vijon puna intensive për zbardhjen dhe dokumentimin e plotë të ngjarjes së ndodhur mbrëmjen e 11 qershorit, ku mbeti i vrarë me armë zjarri shtetasi H. B. Identifikohet, kapet dhe vihet në pranga një nga bashkëpunëtorët në vrasjen e shtetasit H. B. Më parë është shpallur në kërkim dhe një nga autorët e dyshuar të kësaj ngjarjeje.
Nga Sektori i Krimeve të Rënda ndaj Jetës dhe Pronës dhe Sektori i Forcës Operacionale dhe Kërkimit në DVP Tiranë, pas një pune të mirorganizuar dhe të pandërprerë, nën drejtimin e Prokurorisë së Rrethit Gjyqësor Tiranë, u bë i mundur ndalimi i shtetasit S. M., 22 vjeç, banues në Tiranë.
Ndalimi i këtij shtetasi u bë pasi, në datën 11.06.2020, rreth orës 21:50, në rrugën ”Prokop Mima” Tiranë, ka bashkëpunuar në vrasjen me armë zjarri të shtetasit H. B. Shtetasi S. M. është nipi i shtetasit P. M., i cili është vrarë në vitin 2006, në Angli, nga shtetasi H. B.
Menjëherë, pasi ndodhi kjo ngjarje është bërë edhe shpallja në kërkim e shtetasit V. M., si një nga autorët e dyshuar të kësaj ngjarjeje. Në cilësinë e provës materiale janë sekustruar 3 automjete dhe një sërë provash të tjera materiale, me të cilat dokumentohet implikimi i këtij shtetasi në këtë ngjarje.
Ndërkohë, vazhdon puna për identifikimin dhe kapjen e autorëve të tjerë të mundshëm të përfshirë në këtë ngjarje. Materialet për ndalimin e shtetasit S. M. i kaluan Prokurorisë së Rrethit Gjyqësor Tiranë, për veprat penale “Vrasja për gjakmarrje”, e kryer në bashkëpunim dhe ”Armëmbajtja pa leje”.
LEXO EDHE:
Vrasja e Hekuran Billës, Policia arreston të dyshuarin që ndoqi lëvizjet e viktimës
