Nga Laert Miraku
Njeriu më i pasur i botës, Elon Musk ka sot ditëlindjen dhe mbush 51 vjeç. Historia e jetës së tij është frymëzim për të gjithë. Musk i përqendroi të gjitha resurset dhe ambicien e vet në teknologji e ndoshta për këtë arsye është njeriu më i pasur i planetit sipas revistës “Forbs”.
Në të gjithë globin, Elon Musk njihet thuajse nga të gjithë për dy kompani të rëndësishme, Tesla dhe Space X. Musk kërkon që ëndrrat e tij t’i ktheje në realitet. Space X është kompania e parë që ka dërguar turistë në hapësirë për të bërë një “xhiro” në orbitën e Tokës.
Ajo që pak njerëz dinë është se SpaceX po lëshon nga 60 setelitë për çdo fluturim. Starlink është kompania “bijë” e Space X. Kujtojmë se Starlink është një projekt që synon të ngrejë një mega konstelacion prej më shumë se 40000 satelitë në orbitë.
Nuk e dimë nëse kryeministri Edi Rama është frymëzuar nga suksesi absolut i Musk, që dhe vendi ynë të ketë së paku dy satelitë në orbitë. Në Nëntor të vitit kaluar, Rama premtoi se këtë vit do të hidhen në hapësirë dy satelitë “Albanian 1” dhe “Albanian 2”. Një vit më parë Rama theksoi se satelitët dhe dronët inteligjentë do të ndihmojnë për të patur kontroll të plotë mbi të gjithë territorin e vendit. I pari parashikohej të lëshohej në mars 2022 dhe i dyti rreth dy muaj më pas, në qershor. Deri ditën e sotme asnjë satelit i Shqipërisë nuk është në hapësirë.
Të njëjtin premtim, kryeministri Edi Rama e përsëriti paraditen e kësaj të marte. Mes të tjerash kryeministri u shpreh se, ka pasur vonesa për të dërguar në orbitë satelitët “Albania 1” dhe “Albania 2”, por ideja do të realizohet brenda këtij viti.
Nuk e dimë nëse përsëritja e premtimit për të ngritur në hapësirë dy satelitët shqiptarë është bërë rastësisht në ditëlindjen e Elon Musk. Ai ishte ky një sinjal? Deri më sot askush nga qeveria nuk ka deklaruar se ku do të blihen këto satelitë sepse vendi ynë e ka të pamundur t’i prodhojë. A mund t’i blejë qeveria satelitët te kompania e Elon Musk? Ende nuk është folur publikisht për kostot e këtyre dy satelitëve.
Një javë më parë, në media u publikua lajmi se u shkarkua nga detyra Adrian Kamenica, sekretari i përgjithshëm i Ministrisë së Mbrojtjes. Ne media u shkrua se vendimi ka ardhur si ”hakmarrje” prej dështimit të projektit që synonte lëshimin në hapësirë të satelitëve “Albania 1” dhe “Albania 2”.
Për sa kohë kryeministri e ri-premtoi ngritjen e satelitëve duket se diçka do të realizohet. Ai tha se inspektimin e bujqësisë do ta bëjë nga qielli me dronë dhe satelitë dhe jo nga toka me inspektorët në terren. Por a është mungesa e satelitëve dhe dronëve problemi kryesor se përse bujqësia shqiptare është në këtë situatë kaq të pafavorshme.
Qeveritë shqiptare në 30 vitet e fundit thuajse për asnjë moment të vetëm nuk kanë menduar për zhvillimin e saj. Politikanët shqiptarëve iu kanë shitur vetëm ëndrra se ditën që partia e tyre të vinte në pushtet gjithçka do bëhej më mirë dhe se bujqësia do të lulëzonte.
Asnjëra prej qeverive nuk do që t’i japi zgjidhje situatës së rëndë në të cilën ndodhet bujqësia e vendit tonë. Shqiptarët tashmë e kanë kuptuar këtë. Tani fëmijët e fermerëve nuk dalin më në sheshe për të mbështetur një parti politike për të ardhur në pushtet e për të pritur ndryshimin.
Të rinjtë shqiptarë kanë zgjedhur revolucionin e heshtur. Ata largohen nga Shqipëria. Dy vite më parë Eurostat deklaroi se 700, 000 mijë shqiptarë kishin marrë leje qëndrimi në Bashkimin Europian që nga viti 2008 deri në vitin 2020.
Në ditët e sotme kjo shifër është mbi 1 milion, pa llogaritur ata që ndodhen jashtë kufijve pa dokumente. Shqiptarët kanë zgjedhur të mos besojnë më.
Edhe nëse kryeministri do të mbajë ri-premtimin për satelitët, të gjithë fermerët përveç qeverisë e dinë shumë mirë që nuk është mungesa e satelitëve “thembra e Akilit”. Gjetiu është halli, por politikanëve shqiptarë nuk u intereson.
