President i Filipineve, Rodrigo Duterte është shprehur së fundmi përpara qytetarëve vendas se të gjithë ata që mendojnë se do ta shohin ndonjë ditë në gjyq ndërkombëtar për luftën e përgjakur që po i bën trafikut të drogës, janë budallenj.
“Ju jeni të çmendur. Kurrë nuk do të më shihni në ndonjë gjyq ndërkombëtar për luftën që po i bëj trafikut të drogës në vend. Unë jam nga ky vend. Filipine ka gjykatat e veta. Ju jeni duke menduar se do të më çojnë në gjykatë ndërkombëtare që të më gjykojnë. Epo, kush mendon kështu është budalla”-u shpreh ai.
Kundërshtarët politikë të Dutertes thonë se shanset janë realisht të pakta që ai të gjykohet për luftën e ashpër e gjakësore ndaj trafikantëve të drogës, pasi ka kontroll të plotë mbi policinë dhe gjykatat.
Risjellim në vëmendje se Duterte ka deklaruar më herët se i është përkushtuar aq shumë luftës së trafikut të drogës, sa do të pranonte të shkonte edhe në gjyq ndërkombëtar në Hagë. Kjo deklaratë e tij erdhi fill pasi një prokuror i Gjykatës së Hagës deklaroi në vitin 2018 se një hetim i pavarur ndërkombëtar kishte nisur për vrasjet masive që bëhen në Filipine ndaj trafikantëve të lëndëve narkotike.