Mapo.al
Redian Zyka kishte ardhur nga Berati të protestonte në Tiranë ditën e shtunë. 37-vjeçari është ngritur në këmbë, se siç thotë sot nuk ka një vend pune. Kjo është dhe arsyeja pse iu bashkua Partisë Demokratike në marshimin para Kryeministrisë. Turma e qytetarëve u zhvendos drejt Parlamentit dhe Rediani zgjodhi që të shkonte edhe aty.
Nuk qëlloi Policinë, nuk kishte as një send të fortë në dorë, por po rrinte pranë selisë të Komunitetit Mysiman duke vazhguar protestën. Në këtë moment hidhet gaz lotsjellës dhe Rediani nuk kuptoi asgjë. Thjesht nuk ndjehet mirë dhe bie në tokë.
“Pashë që njerëzit po vraponin, nuk po e kuptoja, kur ndjeva gazin dhe aty fërkova sytë. Nuk e dija që sytë nuk duheshin fërkuar. Më pas nuk po shikoja më, edhe frymë nuk merrja dot. Nga ky moment s’mbaj mend shumë, por më ndihmoi dikush që më largoi nga aty”, – shprehet Rediani për Gazetën Mapo. Eshte tashmë pasdite, ka 2 orë që ka mbaruar protesta, por 37-vjeçarit i duhet dhe pak kohë për të marrë veten.
“Vetëm vrapoja deri tek ky ushtari (Ushtari i panjohur) dhe më thanë që të vija këtu te spitali. U hodh shumë gaz. Unë thuajse s’kam parë asgjë deri sa erdha tek spitali. Tani po marr oksigjen dhe më pas do iki për në Berat, se aty kam familjen”, – flet thuajse me sy të mbyllur Redian Zyka.
Si Rediani ishin me dhjetra që kanë mbërritur tek Poliklinika nr.9 në Tiranë, por edhe te QSUT-ja. Gazeta Mapo bëri një udhëtim tek poliklinika që ndodhet më pranë sheshit ku u hodh gaz lotsjellës, deri në QSUT dhe tek Trauma.
Dikush s’merte dot frymë, dikush tjetër kishte thithur aq shumë gaz lotjsellës, aq sa i duhej oksigjen patjetër. Poliklinikat, QSUT dhe te Trauma, i ngjanin dje pasdreke një situate lufte. Qytetarë që vinin dhe kërkonin ndihmë. Dikush kishte probleme me sytë, dikush tjetër me frymarrjen, dhe shumë të afërm të shqetësuar që pyesnin për shëndetin e të lënduarve.
Kishte dhe nga ata që i trembeshin pasojave të gazit lotsjellës, prandaj kërkonin në internet çfarë dëmtimesh të jepte. Çfarë qenka kjo gjë e rëndë që përdoret nga qeveria kundëe qytetarëve të saj, vrisnin mendjen shumë prej tyre. “Nuk qenka vetëm për të shpërndarë turmat, por për t’i lënduar qytetarët”, thotë një burrë qe ka zënë nje shtrat në urgjencën e QSUT.
“Do vij prapë të protestoj”, – shprehet i vendosur Rediani, i cili pas disa minutash e ka marrë veten dhe nis e largohet me sytë gjysmë të mbyllur drejt Fakultetit Ekonomik, aty ku e pret autobuzi për në Berat. Ka dy fëmijë dhe gruan që po e presin, një familje që jeton vetëm me ndonjë punë rastësore që i del atij.
“Unë isha edhe në protestat e tjera, por këtë herë hodhën shumë gaz”, – shprehet një i ri, i cili pret radhën për një shtrat te Poliklinka nr.9.
“Nuk na ka trembur 1997-a, jo më ky gaz”,- thotë një i moshuar, i cili po pret djalin e tij të marrë oksigjen.
Qytetarë të lënduar nga gazi lotsjellës ka shumë edhe tek QSUT-ja dhe tek Spitali i Traumës. Mes tyre, diku shfaqej edhe ndonjë polic, i cili vëzhgonte situatën, ndoshta po merrte emrat e atyre që do t’ju pritej fletë-arresti.
Tek qytetarët kishte lot në sy, diku lot të vërtetë drame, diku lot të shkaktuar nga gazi lotjsellës, por nuk kishte të penduar.
“Do të dalim prap në protestë”, – thonë ata njëzëri.
i biri i monstrave spiro kolek,enver e kristaq rama duhet te ndalet me gjdo qmim.