Ornaldo Rakipi, ashtu si edhe babai i tij, Aqif Rakip, e kanë drejtuar gishtin drejt ish kryetarit të PD-së, Lulzim Basha, për sanksionimin nga SHBA të ish-deputetit.
Gjatë fjalës në Kuvend, Rakipi tha se babai i tij është i pastër, por se vendimi i DASH ka ardhur si pasojë e deklaratave të bëra në drejtim të familjes së tij nga Basha. Ai shtoi se familja Rakipi ka vendosur të apelojë vendimin.
“Dua të sqaroj fillimisht qytetarët, votuesit e mi, se sa i takon aktit të Departamentit të Thesarit, im atë po ndërmerr çdo hap institucional dhe ligjor, për të çuar në vend këtë padrejtësi. Ne sigurisht e vlerësojmë administratën amerikane, dhe vendimi i tyre e ka dhënë vetë mundësinë e apelimit. Procedurë që tashmë është në rrugë e sipër.
Aqif Rakipi është përmendur dhe përgojuar shpesh kohët e fundit, sidomos nga Lulzim Basha dhe ndonjë njeri i afërt me të.
Eshtë demonizuar pa të drejtë dhe është hedhur shumë baltë mbi të.
Kam një fjalë për Lulzim Bashën. Mos mallko suksesin e tjetrit, por mëso se në thelb politika është marrëdhënia me njerëzit. Dhe pikërisht kjo është arsyeja e dështimit tënd serial, është kjo arsyeja pse ti, edhe pse të janë dhënë shanset më të mëdha që i janë dhënë dikujt në këto 30 vite, nuk arrite të fitosh zemrat dhe besimin e njerëzve. Sepse në thelb je fallco, dhe sheh vetëm interesin tënd egoist e material”, u shpreh ai.
Aqif Rakipi u shpall ditën e hënë non-grata nga departamenti Amerikan i Shtetit, si i përfshirë në krimin e organizuar dhe që ka përdorur ndikimin e tij në politikë për të emëruar miqtë e tij në Tiranë dhe Elbasan. Në një reagim për një portal, Rakipi tha të mërkurën se “Lul Basha e ka merakun”, duke nënkuptuar se sanksionimi nga SHBA i ka ardhur nga ish-kryedemokrati.
