Kryeministri Rama i pyetur mbrëmë në Opinion nga gazetarët se mbi cilat kritere ishte nisur në caktimin e ministrave të rinj të qeverisë që sapo ka krijuar, u shpreh se ka gjykuar se personat janë më të përshtatshëm për momentin në sektorët ku janë vendosur.
Gazetari Kodra e pyeti Ramën në lidhje me emërimin e Ulsi Manjës si ministër Drejtësie, duke qënë se ai ka dalë në përgjimet e publikuara nga Bild lidhur me dosjen 184 që ka të bëjë me krimin elektoral në zgjedhjet e Bashkisë Dibër.
Kryeministri u shpreh se ato përgjime nuk janë asgjë.
“E ça, në ato përgjime kam dalë dhe unë“, tha Rama.
Gazetari Kodra reagoi duke u shprehur se mirë do të ishte që edhe ai të mbante përgjegjësi.
Por Kryeminstri tha se ka 16 persona të proceduar tashmë për atë dosje.
Shefi i qeverisë po ashtu ka sqaruar se nuk i ka njoftuar askujt paraprakishte ndryshimet që u morën vesh në sallë, duke qënë se askush që është pjesë e ekipit nuk mund të thotë jo kur i ngarkohet një detyrë.
Rama pohoi se me numrin e madh të grave ministre, qeveria e tij bën pjesë në 10-shen e parë të OKB.
Në tërësi në komunikimin e parë publik pas krijimit të qeverisë së re, Rama kishte tone të qeta, dhe nuk shfaqi shenja nervozizmi.
Sa i takon meritave të ekipit të tij, ai theksoi se vota në zgjedhjet e 25 prillit ka qënë për PS, jo për individët, duke minimizuar rolin e atyre si Taulant Balla, i cili edhe pse mori vota personale me shumë se shefi i rilindjes, me ndryshimet që erdhën jo vetëm nuk u shpërblye, përkundrazi u penalizua me reduktim të funksioneve dhe me internim në një qark tjetër, duke ia hequr domenin e tij të preferuar Elbasanin, ku kishte ngritur një pushtet okult me lidhje shumë të dyshimta.
