Kryeministri Edi Rama ka shpërndarë në rrjetet sociale një video nga Tropoja, ku kandidati për deputet në këtë zonë, Petrit Malaj shprehet se qytetarët duhet të votojnë për PS-në, që edhe Tropoja të ndryshojë.
Në video, kanë komentuar shumë qytetarë, ndërsa kreu i qeverisë iu ka kthyer përgjigje komentuesve.
Një prej tyre, shprehet se Rama do të marrë në Tropojë humbjen më të thellë ndonjëherë. Koment të cilin kryeministri nuk ka ngurruar t’i kthehet me arrogance.
“Mëso të shkruash shqip të paktën se humbjen dhe fitoren e ndan populli, jo analfabetët funksional me dy gishta përpjetë, që xhirojnë goma rrugëve e bëjnë thirrje për të vrarë njerëz!”, ka shkruar Rama.
Një tjetër komentues shkruan se në 30 vjet, në shumë vite, Tropoja është qeverisur nga PS e se Partia Socialiste nuk ka bërë gjë për këtë krahinë.
Edhe këtij komentuesi, kryeministri ka zgjedhur t’i kthejë përgjigje, por shkurt: “Hapi sytë dhe shiko”.