Instituti i Shëndetit Publik ka konfirmuar praninë në Shqipëri të variantit më të ri të Omicronit, Ba2. Konfirmimi erdhi pas dërgimit të mostrave në laboratorët e referencës në Berlin.
Prej javësh specialistët kishin dyshime për qarkullimin e një varianti tjetër të koronavirusit, edhe më të transmetueshëm se Omicron, pasi ditët e fundit infektimet filluan serish rritjen. Epidemiologu Artan Simaku tregon se simptomat janë të njëjta, por zgjat më tepër se Omicron.
“Nga ana klinike, shenjat dhe simptomat janë të njëjta vetëm është vërejtur nga eksperienca në shtetet ku po qarkullon ky variant, ka një kohëzgjatje më të gjatë sesa varianti bazë Omicron. Klinicistët kanë vënë re që mund të japë diskomfort të barkut ose një diarre të lehtë. Ky nënvariant po qarkullon në shumë vende të Europës dhe rajonit. Momentalisht, në Shqipëri nuk është vërtetuar, por nuk përjashtohet mundësia e qarkullimit. Është çështje kohe që të hyjë në Shqipëri përderisa qarkullon në Europë e rajon”, thotë epidemiologu Artan Simaku, duke shtuar më tej se parashikohet një rritje e lehtë e numrit të rasteve, sidomos te personat e pavaksinuar.
Ndaj, Simaku thekson rëndësinë e vaksinimit, i cili mbron edhe nga ky variant. Apeli shkon për personat mbi 60 vjeç dhe me sëmundje kronike.
Nënvarianti i Omicron ka rritur numrin e të infektuarve në shumë shtete në Europë si Itali, Francë, Gjermani, Greqi. Por ndërkohë në Angli është shfaqur një tjetër nënvariant i Omcron Xe në 600 persona, i cili ka shfaqur 10% infektueshmëri me shumë se Ba2.
