Një propozim i Edi Ramës, nga forumi ku ai merr tashmë vendimet, më saktë shpall dekretet, pra nga kompjuteri ku është lidhur me live-stream të Facebook, se ka ndërmend që nga Tetori deri në Mars të ndalojë qarkullimin e makinave ditën e Dielë, solli në shportën e rilindjes mollët që ai shpresonte.
Debat dhe reagime. I madh e i vogël ranë kryengulthi në këtë karrem, dhe prej dy ditësh po diskutohet jo pak.
Rama tashmë e ngriti rrjetën dhe mbroth ngjan se i ka shkuar. Ai e di mirë ku janë limeret e opinionit dhe i gjuan deri në skutat më të errëta.
Duhet dhe është e vlefshme çdo temë, provokim dhe nxitje në rrjet e media, që largon vemendjen nga Teatri, nga rënia tragjike e konsumit pas 2 muajsh mbyllje, nga realiteti i trishtë i pandemisë ekonomike ku ndihma e ububushme e qeverisë që ishte një mal në propagandë, po del një thërrime në jetën e përditshme.
Në veçanti, lypset një amnezi urgjente për të sfumuar rrënojat e godinës që mori me vete imazhin e kuruar me shumë vite e me shumë financime, të një kryeministri artist, të një rock-stari që gjasme po transformonte krejt vendin, pasi kishte ngjyrosur Tiranën, si kryetar Bashkie.
Këtë e tha media më prestigjioze e botës, e theksoi “Le Monde”, dhe e vuri thekshëm në dukje deputeti gjerman Schmid, duke pohuar se rrënimi i Teatrit në paligjshmëri dhe në dhunë, nuk pritej sidomos nga një artist. Me siguri, prej këtij konstatimi, sëmbimet do kenë qënë të rënda tek shefi i rilindjes, i cili ja ka dalë që me këtë imazh, me këtë fasadë, të hajë bukë gjatë në politikë, e të sigurojë shumë mbështetje ndërkombëtare.
Ndaj, ai është gati të propozojë ndalimin e qarkullimit me makinë edhe të Martën, apo ditën e Shën Gjonit, vetëm e vetëm që një ndezulli e re të marrë hov, e të harrohet rrënimi politik, kredencialet që u rroposën e copëtuan më keq se rekuizita e Teatrit Kombëtar.
Çdokush e di se as e Diela që dekretoi nga Facebook, dhe as e Marta nëse i teket, për të ndaluar lëvizjen e qytetarëve, nuk ka për të funksionuar. Makina është instrument lirie, është mjet pune, dhe është pjesë e një zinxhiri të pafund ekonomie në vend.
S’ka për t’u zbatuar asnjë ditë. Siç nuk po merren në konsideratë e po shpërfillen masivisht edhe kufizimet për fundjavat, që ai i heq dhe i vë, sipas oreksit. Por, një rezultat po e merr gjithsesi. Atë çka dëshiron. Të flitet për të, dhe jo për ato çka ai bën.
Mapo.al
